OKQ-da ótken baspasóz konferensıasy barysynda aýyl sharýashylyǵy vıse-mınıstri Amanǵalı Berdalın epızootıalyq jaǵdaıdy saqtaý boıynsha qabyldanyp jatqan sharalar týraly málimdedi.
Onyń aıtýynsha, sý tasqyny saldarynan Aqtóbe, Batys Qazaqstan jáne Soltústik Qazaqstan oblystarynda 12 sibir jarasy kómindisin, sondaı-aq BQO-da 8 mal qorymyn sý basty, dep habarlaıdy Almaty-akshamy.kz Aýyl sharýashylyǵy mınıstrligine silteme jasap.
Mınıstrliktiń aýmaqtyq bólimsheleri respýblıkalyq veterınarıalyq zerthanamen birlesip, osy kómý oryndarynan sý ketkennen keıin topyraq úlgilerin aldy. Teris nátıjeler alynǵannan keıin barlyq kómý oryndary profılaktıkalyq dezınfeksıa jumystary júrgizildi.
"Profılaktıkalyq is-sharalar, sonyń ishinde janýarlardy asa qaýipti aýrýlarǵa qarsy vaksınalaý nátıjesinde epızootıalyq jaǵdaı saqtalyp, aýrýlar taralýynyń aldyn alýǵa qol jetkizildi.
Qazirgi ýaqytta 23 aýrýǵa qarsy profılaktıkalyq vaksınasıa júrgizilýde, 178,2 mln. manıpýlásıa júrgizý josparlanǵan.
Janýarlardyń qaýipti jáne sozylmaly juqpaly aýrýlaryn anyqtaý maqsatynda janýarlardyń 26 asa qaýipti aýrýlary boıynsha 74,9 mln dıagnostıkalyq zertteý júrgizý josparlanǵan", - dep atap ótti vıse-mınıstr.
Janýarlardyń, onyń ishinde adamdar men janýarlarǵa ortaq juqpaly aýrýlarynyń qozdyrǵyshtaryn ákelýdi jáne taratýdy boldyrmaý maqsatynda veterınarıalyq-sanıtarıalyq is-sharalar júrgizilýde.
Úshinshi elderge jáne EAEO elderine qatysty 2024 jyly Qazaqstan aýmaǵynda joǵary patogendi qus tumaýyna (Avstralıa, Úndistannyń 4 shtaty, AQSH-tyń 30 shtaty), afrıkalyq shoshqa obasyna (Italıa, Polsha, OAR), qoı men eshki sheshegine (Grýzıa), usaq kúıis qaıyratyndardyń obasyna (Grýzıa) ýaqytsha shekteýler engizildi.
QR DSM Sanıtarlyq-epıdemıologıalyq baqylaý komıtetimen vedomstvoaralyq ózara is-qımyl sheńberinde jáne 2024 jylǵa arnalǵan tamaq qaýipsizdigi boıynsha memlekettik monıtorıń josparyn iske asyrý barysynda Komıtet EAEO elderiniń 3 kásiporny men sút jáne sút ónimderi boıynsha 5 kásiporynǵa qatysty et ónimderi boıynsha veterınarıalyq-sanıtarıalyq sharalar qabyldady.
QR Memlekettik shekarasy arqyly baqylaýdaǵy taýarlarmen avtokólik quraldaryn ótkizý kezinde veterınarlyq-sanıtarlyq erejelerdiń buzylýyna baılanysty 458 avtokólik quralymen mal sharýashylyǵy ónimderin ákelýge jol berilmegen.
Veterınarıalyq baqylaýdy kúsheıtý sheńberinde veterınarıalyq júıeni sıfrlandyrý boıynsha jumys júrgizilýde, bul ónimniń qozǵalysyn neǵurlym tıimdi baqylaýǵa jáne onyń sıfrlyq qadaǵalanýyn qamtamasyz etýge múmkindik beredi.
Búgingi tańda mal sharýashylyǵy ónimderiniń qadaǵalaný modýli pılottyq rejımde barlyq óńirlerde iske asyrylýda jáne 2024 jyldyń sońyna qaraı aıaqtalady.
Oǵan 1600-den astam mal soıý nysany, veterınarıalyq-sanıtarıalyq saraptama zerthanalary, saýda nysandary qosylǵan, 89 myń №2 nysandy veterınarıalyq anyqtama jáne 334 myń saraptama aktisi resimdelgen.
"Mınıstrlik qabyldaǵan sharalardyń nátıjesinde, RF men QHR engizgen aýsyl boıynsha shekteýler alynyp tastaldy, Reseı men Qytaı naryqtaryna mal sharýashylyǵy ónimderiniń eksporty qaıta jandandy.
Búgingi tańda kásiporyndar Qytaı naryǵyna muzdatylǵan sıyr etin eksporttaýǵa ruqsat alý úshin QHR Tiziliminde tirkeý rásiminen ótýde.
Qytaı, Vetnam, Sıngapýr, Malaızıa, EO, Japonıa, Iran, Ázirbaıjan, Parsy shyǵanaǵy elderimen eksporttalatyn taýarlar tizbegin keńeıtý boıynsha jumys jalǵasýda ", - dep sózin qorytyndylady A.Berdalın.
Aýyl sharýashylyǵy mınıstrligi epızootıalyq jaǵdaıdy saqtaý, aýyl sharýashylyǵy ónimderiniń qaýipsizdigi men sapasyn qamtamasyz etý maqsatynda barlyq qajetti sharalardy qabyldaýdy jalǵastyrýda