Ol Shymkent qalasynda boı kóteredi.
Premer-mınıstrdiń orynbasary Serik Jumanǵarın «Alarko Holding» túrik kompanıasynyń vıse-prezıdenti Shahın Abbaspen kezdesti, dep habarlaıdy aqshamnews.kz.
ASHM habarlaýynsha, kezdesýge qatysýshylar quny $650 mln bolatyn qyzanaq ósirý boıynsha aýqymdy ınvestısıalyq jobany iske asyrý barysyn talqylady. Shymkentte 2025 jyldyń sońyna deıin eki kezeń boıynsha jylyjaı keshenin jáne ósirilgen ónimdi qaıta óńdeıtin seh salý josparlanyp otyr. Birinshi kezeńde – 45 gektar, ekinshi kezeńde – 130 gektar. Tolyq qýatqa shyqqanda keshen jylyna 51 myń tonna ónim óndirýge múmkindik beredi. Ótkizý naryqtary: ishki jáne Reseı Federasıasy, Qatar, BAÁ-ge eksporttaý.
Kásiporynda 2 myńǵa jýyq jumys orny ashylady. Kompanıa Shymkentte jylyjaılarǵa arnalǵan qurylymdar shyǵaratyn zaýyt ashýdy josparlap otyr, bul qurylys merzimin qysqartýǵa múmkindik beredi. Joba aıasynda halyqaralyq standarttar boıynsha aýyl sharýashylyǵy mamandaryn daıarlaý úshin mamandandyrylǵan akademıa qurylady.
Taraptar ınvestısıalyq jobany iske asyrý úshin memlekettik qoldaý sharalary kózdelgen ınvestısıalar týraly kelisimniń jobasy men sharttaryn talqylady.
Serik Jumanǵarın ınvestorǵa jan-jaqty qoldaý kórsetiletinin aıta kele, aýyl sharýashylyǵynyń basqa da basym salalarynda, atap aıtqanda, astyq, qant qyzylshasy, terini tereń óńdeýdi qosa alǵanda, óndiristi jolǵa qoıý múmkindigin qarastyrýdy usyndy.