Memleket basshysy Qasym-Jomart Toqaev Ǵylym jáne tehnologıalar jónindegi ulttyq keńestiń otyrysynda qorshaǵan ortany qorǵaýdyń mańyzdylyǵy týraly aıtty.
Sondaı-aq Prezıdent BUU aıasynda 2026 jyly Qazaqstanda Aımaqtyq klımat samıti ótetinin atap ótti, dep habarlaıdy Almaty-akshamy.kz.
«Jańa aıtqanymdaı, keıingi jyldary álemde tabıǵı jáne tehnogendik apattardyń sany kúrt kóbeıdi. Iaǵnı, jahandyq ındýstrıalandyrý men ýrbanızasıa úderisi klımattyń ózgerýine tikeleı áser etip otyr. Keıbir boljamǵa qarasaq, bul úrdis aldaǵy bes jylda álem ekonomıkasyna shamamen bes trıllıon dollar shyǵyn ákeledi. Sondyqtan qorshaǵan ortany qorǵaý – biz úshin mańyzdy máseleniń biri.
IýNESKO sheshimimen 2020 jyly Almatyda qurylǵan Óńirlik glásıologıalyq ortalyq klımattaǵy ózgeristerdi zertteýge zor úles qosyp keledi. Ǵalymdarymyz muzdyqtardyń erýin zerttep qana qoımaı, selden jáne muzdaq kólderden keletin qaýipke qarsy qorǵanysymyzdyń osal tustaryn kúsheıtý joldaryn da izdeıdi. Glásıologıalyq ortalyqtyń áleýetin tolyq paıdalaný qajet. Úkimet ortalyqty ǵımaratpen qamtamasyz etý mindetin sheship jatyr. Endi Qazaqstan Úkimeti men IýNESKO arasyndaǵy Glásıologıalyq ortalyqtyń qyzmeti týraly kelisimdi uzartý máselesine erekshe nazar aýdarý qajet. Sebebi onyń merzimi bıyl aıaqtalady. BUU aıasynda 2026 jyly Qazaqstanda Aımaqtyq klımat samıti ótedi. Bul mańyzdy is-shara halyqaralyq qoǵamdastyqtyń nazaryn muzdyqtardyń erýi, ózender men kólderdiń taıazdanýy, shóleıttený, jerdiń tozýy sıaqty problemalarǵa aýdarýǵa múmkindik beredi. Samıtke daıyndyqty qazirden bastaý kerek. Bul jıyn óńirlik jáne jahandyq ekologıalyq syn-qaterlerge tótep berý úshin ǵalymdardyń, sarapshylardyń, saıasatkerlerdiń kúsh-jigerin jumyldyrýǵa yqpal etetinine senimdimin», - dedi Memleket basshysy.