Búginde mektep oqýlyqtarynyń sıfrlyq formatqa kóshirilý kórsetkishi 100%-dy quraıdy.
Oqýlyqtar memlekettik saraptamadan ótip, oqý-ádistemelik keshender tizimine engizildi. Sıfrlyq oqýlyqtar elimizde 13 baspanyń 11 platformasynda ázirlenýde, dep habarlaıdy Almaty-akshamy.kz Oqý-aǵartý mınıstrligine silteme jasap.
«Pánderdi oqytýda ınovasıalyq ádis-tásilderdi engizý maqsatynda pedagogterdiń qoldanýy úshin ádistemelik usynystar ázirlendi. Muǵalimder sabaqtardy zamanaýı sıfrlyq tehnologıalardy, onlaın komýnıkasıalardy, saralaý men daralaýdy paıdalana otyryp ótkizedi, sondaı-aq onlaın resýrstardy qoldaný boıynsha bilimderin jetildiredi», - dep atap ótti QR OAM Bilim salasynda sapany qamtamasyz etý komıteti tóraǵasynyń orynbasary Maıra Meldebekova.
Budan basqa, robototehnıka, STEM, hımıa, fızıka, bıologıa pánderi boıynsha 1345 zamanaýı kabınet ashý jumystary júrgizilýde. Jyl sońyna deıin 20 óńirdegi 1072 mektep zamanaýı kabınettermen jabdyqtaldy.