Elimizde daktıloskopıalyq jáne genomdyq tirkeýdi júrgizýdiń jańa erejeleri halyq nazaryna usynyldy, dep habarlaıdy almaty-akshamy.kz.
Ashyq NQA portalynda jarıalanǵan qujat jobasynda Qazaqstan Respýblıkasynyń azamattarynan, daktıloskopıalyq tirkeýden ótken sheteldikter men azamattyǵy joq adamdardan daktıloskopıalyq aqparattyń ne úshin jınalatyny aıtylǵan.
- QR azamattarynyń, sheteldikterdiń jáne azamattyǵy joq adamdardyń jeke basyn rastaý jáne (nemese) anyqtaý;
- QR aýmaǵynda sheteldikter men azamattyǵy joq adamdardy esepke alý jáne baqylaý;
- jeke adamnyń, qoǵamnyń jáne memlekettiń qaýipsizdigin qamtamasyz etý;
- daktıloskopıalyq aqparat boıynsha jeke basyn rastaý rásimi arqyly Qazaqstan Respýblıkasynyń memlekettik shekarasynan ótetin adamdardy esepke alý jáne baqylaý.
«Daktıloskopıalyq tirkeýdiń maqsaty – daktıloskopıalyq aqparat negizinde adamnyń jeke basyn anyqtaý jáne rastaý. Jeke basyn anyqtaý daktıloskopıalyq aqparattyń derekqory boıynsha sáıkestendirýdi júrgizý kezinde, jeke basyn rastaý – naqty adamnyń daktıloskopıalyq aqparaty boıynsha verıfıkasıalaý jolymen júzege asyrylady», - delingen qujat jobasynda.
Daktıloskopıalyq tirkeýdi ishki ister organdary, syrtqy saıası qyzmet salasyndaǵy ýákiletti memlekettik organ, sheteldegi dıplomatıalyq jáne olarǵa teńestirilgen ókildikter, sondaı-aq QR konsýldyq mekemeleri, kólik salasyndaǵy ýákiletti memlekettik organ jáne Ulttyq qaýipsizdik organdary júrgizedi.
«Daktıloskopıalyq aqparatty jınaý daktıloskopıalaý jáne tıisti aqparattyq júıege derbes derekterdi engizý arqyly adamnyń eki alaqany nemese eki qolynyń on saýsaǵynyń papıllárlyq úlgileriniń qurylymdyq erekshelikteri týraly bıometrıalyq derekterdi alýdy qamtıdy», - delingen erejede.
Qujat jobasy 30 shildege deıin kópshiliktiń talqysyna usynylyp otyr.