Táýligine 20-ǵa deıin ınfeksıa juqtyrý deregi tirkelýde.
Sanıtarıalyq-epıdemıologıalyq baqylaý komıtetiniń resmı ókili Erjan Baıtanaev eldegi epıdahýal jaıynda túsinikteme berdi, dep habarlaıdy Almaty-akshamy.kz
Elimizde COVID-19 boıynsha epıdemıologıalyq jaǵdaı turaqty, táýligine 20-ǵa deıin ınfeksıa juqtyrý deregi tirkelýde, bul ınfeksıanyń taralý koefısıentine de áser etti, sáýir aıynan beri bul kórsetkish 1-den tómen.
Naýqastardyń 98%-dan astamy saýyǵyp shyqty. Sáýirdiń ótken kezeńinde naýryzdyń uqsas kezeńimen salystyrǵanda syrqattanýshylyq deńgeıi 8,3 esege tómendedi (2 345-ten 280 jaǵdaıǵa deıin).
Epıdemıologıalyq jaǵdaıdy baǵalaý matrısasyna sáıkes, 2022 jylǵy 3 naýryzdan bastap Qazaqstan Respýblıkasy jáne barlyq óńirler «jasyl» aımaqta. Sońǵy aıda stasıonarlyq em alatyn naýqastar sany 5,7 esege (588 – den 102-ge deıin), ambýlatorıalyq em alyp jatqan naýqastar 3,4 esege (5655-ten 1655-ke deıin), ınfeksıalyq tósek oryndarynyń júktemesi 2,0 esege 8-den 4%-ǵa deıin, reanımasıalyq tósekter júktemesi 3,5 esege 7-den 2%-ǵa deıin tómendedi.
Búgingi kúni koronavırýstyq ınfeksıaǵa qarsy vaksınanyń birinshi komponentimen 10,5 mln adam egildi, bul ımmýndaýǵa jatatyn kontıngenttiń 83,2%-yn jáne jalpy halyq sanynyń 55,2%-yn quraıdy.
Ekinshi komponentpen 10,1 mln adam egildi, bul ekpe alýǵa tıisti turǵyndardyń 81,0%-y jáne jalpy halyq sanynyń 53,1%-y. Tıisti kontıngenttiń 90%-dan astamy 5 óńirde (Shyǵys Qazaqstan, Jambyl, Túrkistan, Qyzylorda oblystary jáne Shymkent qalasy) ekpemen qamtylǵan.
Revaksınasıadan 3,7 mln adam nemese tıisti kontıngenttiń 59,4% ótti. DDSU málimetteri boıynsha, sońǵy aptada aýrý barlyq aımaqta 24%-ǵa tómendegen, alaıda álemniń 56 elinde aýrýdyń 2-den 300% - ǵa deıin ósýi baıqalady, onyń ishinde BAÁ-de sońǵy aptada aýrýshańdyq kórsetkishteri 2%-ǵa, Úndistanda 55%-ǵa, Chernogorıada 29%-ǵa, Perýde 26%-ǵa ósti, Egıpette 115%, Qytaıda 138%, Fınlándıada 300% artqan. Sonymen qatar Qytaıda Omıkronnyń Stealth nusqasynyń taralýyna baılanysty syrqattanýshylyqtyń kúrt ósýi baıqalady, naýryzdyń bastapqy merzimimen salystyrǵanda aýrý sımptomdary bar naýqastardyń táýliktik sany 5,0 ese, sımptomsyz naýqastardyń sany 1,2 ese joǵarylaǵan. Qazirgi ýaqytta táýligine 18 myńnan astam jaǵdaı tirkelýde.
«Qurmetti qazaqstandyqtar! Aýrýdan eń senimdi qorǵanysh - vaksınalaý jáne ýaqytyly jasalǵan revaksınalaý. Adamdar kóp jınalatyn oryndarda betperde kıýdi jalǵastyrýǵa keńes beremiz, bólmelerge taza aýa kirýi úshin terezeler men esikterdi ashyp, jıi jeldetip turý qajettiligin eske salamyz», - dedi Erjan Baıtanaev.