Qazir organ transplantasıasyna muqtaj 3 805 pasıent bar.
Májilis depýtaty Gúldara Nurymova memleketten donorlarǵa tólem tóleýdi usyndy, dep habarlaıdy Almaty-akshamy.kz
Ol erikti túrde aqshalaı ótemaqyǵa týys emes donorlardyń búıregin alýǵa ruqsat etýdi usyndy.
Depýtattyń aıtýynsha, qazirgi tańda organ transplantasıasyna muqtaj 3 805 pasıent, sonyń ishinde 90 bala kútý paraǵynda tur. Naýqastardyń 91%-i – búırek aýystyrý kezeginde. Ókinishke qaraı, byltyr 320 adam qaıtys bolýyna baılanysty "kútý paraǵynan" shyǵyp qalǵan.
"Zańnamada qaıtys bolǵan adamdardyń organdaryn alýǵa kelisim prezýmpsıasy naqty aıqyndalmaǵandyqtan, máıittik donorlyq qazir damymaı jatyr. Tek týysqan donorlardyń organdary alynady. Bul salanyń toqyraýynyń negizgi sebebi – qaıtys bolǵan jáne týys emes donorlardyń organdarynyń jetispeýshiligi", - deıdi Nurymova vıse-premer Altaı Kólginovke joldaǵan depýtattyq saýalynda.
Ol donorlyqqa jáne organ transplantasıasyna memlekettik deńgeıde qoldaý kórsetilýi qajet dep sanaıdy.
"Qazaqstan halqyna" qory jumysyn bastaǵan sátten bastap oǵan shetelde organ aýystyrý operasıasyna kómek kórsetý boıynsha 261 ótinim túsken. Týys emes donorlardyń organyn alý úshin qazaqstandyqtar sheteldik klınıkalarǵa barýǵa májbúr. Mysaly, Belarýste júrek aýystyrý quny 150 myń dollar, baýyr 140 myń dollar, al búırek 50 myń dollar turady.
"Iran men Pákistanda búırek satý zańdy jáne rettelgen, ortasha baǵasy 5-6 myń dollar. Organ satý týraly beıresmı habarlamalardy Qazaqstanda da kezdestirýge bolady. Onda nege shet elderdiń búırek satý men satyp alý tájirıbesin zerttep, bul prosesti bizde de rettemeske?", - deıdi Nurymova.
Depýtattyń aıtýynsha, qoldanystaǵy zań donor tańdaǵanda genetıkalyq, jaqyn týysqandyq baılanystyń bolǵanyn kózdeıdi. Alaıda kóp jaǵdaıda týystar sáıkes kele bermeıdi.
"Bóten adam organyn berýge daıyn, biraq buǵan zań ruqsat etpeıdi. Osyǵan baılanysty materıaldyq ótemaqyǵa erikti negizde týys emes donorlardyń jáne qaıtys bolǵan donorlardyń búıregin berýge ruqsat etý múmkindigin qarastyrý qajet dep sanaımyz", - dedi Nurymova.