Qazavtojol mamandarynyń aıtýynsha, ol temirden kúrek pen qazannyń qaqpaǵy jasalady eken.
Qazaqstannyń respýblıkalyq mańyzdaǵy kúre joldarynda jyl basynan beri shamamen 20 mln teńgeniń jol ınfraqurylymy elementteri urlandy, dep habarlaıdy Almaty-akshamy.kz
Jol boıynan kóbinese jol belgileri, úı janýarlarynyń jolǵa shyǵyp ketýinen qorǵaıtyn torly qorshaýlar, katafottar men stroboskoptar urlanady. Belgisiz adamdar jaryq baǵyttaıtyn eki úlken transformatordy urlaǵan jaǵdaılar da tirkelgen.
"Urlanǵan jol ınfraqurylymy elementteri kóbinese turmystyq maqsattarda qoldanylady: tórtburyshty jol belgilerinen kúrekter, dóńgelek pishindi jol belgilerinen tabalar men qazandarǵa arnalǵan qaqpaqtar jasap alady. Al úı janýarlarynyń jolǵa shyǵyp ketýinen qorǵaıtyn torlardan úı qorshaýlary jasalsa, jaryqdıodty katafottar velosıpedterge bekitiledi eken", - deıdi vedomstvo.
Dese de, urlyq birtindep azaıyp keledi deıdi Qazavtojol mamandary.
"Ótken jyldarmen salystyrǵanda jol ınfraqurylymy elementterin urlaý faktileri azaıyp keledi. Máselen, salystyrmaly túrde, 2021 jyly bul shyǵyn 60 mıllıon teńgeden asqan bolatyn", - deıdi jol mamandary.
Bıyl jolshylar 8 myńǵa jýyq jańa jol belgilerin, 19 myń dana katafot, 3,5 myń sharshy metr shý jolaqtaryn jáne 10 myń sıgnal baǵanasyn ornatty. Sonymen qatar mamandar 9,7 myń qýma metr tosqaýyl qorshaýlaryn jabdyqtap, 23 myń shaqyrymnan astam jolda tańba syzyǵyn jańartty.
179 avtopavılon jáne demalys alańdaryn jóndedi. Jol qozǵalysy erejelerin saqtap, jol qaýipsizdigin nasıhattaý maqsatymen respýblıkalyq avtotrassalardyń boıynda 300-den astam jańa aqparattyq panno ornatyldy.