Birinshi kredıttik búro shilde aıynda baspana naryǵynda baǵalar qalaı ózgergenin málim etti.
Aqparatqa súıensek, ekinshi naryqta úı baǵasy arzandap keledi. Osynyń aldyndaǵy aıdaǵy kórsetkishke qaraǵanda, bir sharshy metrdiń quny 1,7 paıyzǵa tómendep, 494,4 myń teńgeni qurady, dep habarlaıdy Almaty-akshamy.kz.
Keıingi 5 aıdyń tórteýinde baǵa túsip jatyr (mamyrda ózgergen joq). Atap aıtqanda, osyndaı jaǵdaı 2015 jyldan beri alǵash baıqalyp otyr.
«Jalpy kórsetkishtiń dınamıkasyna negizgi úlesti 5 iri qala qosty. Astanada ekinshi naryqtaǵy úılerdiń baǵasy edáýir tómendep jatyr (-3,4%). Sonymen qatar Almaty (-1,5%), Kókshetaý (-1,3%) jáne Qostanaı (-1%) qalalarynda da edáýir tústi. Al Óskemende bul kórsetkish (-0,5%) aıtarlyqtaı joǵary emes», - delingen búro málimetinde.
Jalpy, jyl basynan qaıta satylymǵa túsken baspana 3,7 paıyzǵa, bir jylda 0,7 paıyzǵa arzandady.
Sonymen qatar jańa baspana quny da túsken. Degenmen, sonshalyqty kóp emes – 0,1%. Qazir sharshy metri 486,2 myń teńge shamasynda.
Baspananyń arzandaýy 4 iri qalada baıqaldy, ıaǵnı Pavlodar (-2,2%), Qostanaı (-1,7%), Almaty (-0,6%) jáne Kókshetaý (-0,9%) qalalaryn atap ótýge bolady.
Budan bólek, baspanany jalǵa alý quny ósken. Shildede jalǵa alynǵan úıdegi sharshy metrdiń quny 4,7 myń teńgeni qurady, bul onyń aldyndaǵy aıdyń deńgeıinen 1,9 paıyzǵa joǵary.
Jalǵa alý quny eń kóp Qaraǵandyda ósti – 3,9%. Odan keıingi orynda Almaty – 3,1%. Baǵanyń kóterilýi Petropavlda (0,6%) jáne Shymkentte (0,1%) da baıqaldy. Qalǵan qalalarda, onyń ishinde Astanada baǵa ózgergen joq.
Jyl basynan beri jalǵa alý aqysy 1,5 paıyzǵa túsken. Alaıda bir jyl qorytyndysy boıynsha onyń quny 28,6 paıyzǵa ósti.