Erteń Májiliste «Halyqtyń shamadan tys kredıt alýyn azaıtý jáne qarjylyq saýattylyqty arttyrý» taqyrybynda Parlamenttik tyńdaý ótedi. Osy tyńdaýǵa qatysty Májilis depýtaty Berik Beısenǵalıev pikir bildirdi, dep habarlaıdy almaty-akshamy.kz Májilis palatasynyń baspasóz qyzmetine silteme jasap.
«Jalpy shamadan tys nesıe alýdy azaıtý jáne qarjylyq saýattylyǵyn arttyrý ózekti bolyp tur. Óıtkeni bizde mıllıondaǵan adam nesıe aldy. Resmı derekti sóıletsek, búginde jeke tulǵalardyń nesıe portfeli 18 trıllıon teńgeden asady. Sonyń teń jartysy tutynýshylyq kepilsiz nesıe – 9 trıllıon, 5 trıllıon 600 mıllıard teńge - ıpoteka, avto nesıe kólemi 2 trıllıon teńgeden asady. Osy úsh nesıelik ónim jeke tulǵalardyń nesıelik portfeliniń 90 paıyzynan asyp tur. 18 trıllıon teńge nesıeni 8,5 mıllıon azamatymyz rásimdep alǵan. Munyń ishinde 1 mıllıon 800 azamat nesıesin ýaqytynda qaıtara almaı júr, bulardyń bereshegi - 2 trıllıon teńge. Búginde nesıe beretin bankterdiń syıaqysynyń paıyzy tym joǵary. Bankrottyq týraly zań qabyldanyp qoldanysqa engizilgen naýryz aıynan bastap 67 myńnan astam adam ótinish jazǵan. Onyń ishinde 4 myńǵa jýyq azamattyń nesıesi bankrottyq dep tanyldy. Bul neni kórsetedi, ótinish bergen adamdardyń tek 6 paıyzy ǵana bankrottyq statýsyn aldy degen sóz. Osy 4 myń adamnyń ishindegi 140 boryshkerdiń árqaısynyń jalpy qaryz somasy 150 myń teńgeden aspaıdy. 18 adamnyń moınynda tóleı almaı júrgen qaryzy 50 myń teńgeden tómen. 4 adamnyń bereshegine tipti kúlesiz – 4 myń teńge. Munyń bári elimizde keı azamattardyń qarjylyq saýattylyǵy tómen ekendiginiń aıqyn kórinisi. Muny ne úshin aıtyp otyrmyn? Álgi 4 myń teńge bereshegi bar adam bankrottyq degen statýsty alǵany úshin endi 5 jyl boıy eshqandaı nesıe rásimdeı almaıdy, shetelge shyǵýyna tyıym salynady. Osyndaı olqylyqqa qarap bankrottyq týraly zańdy áli de pysyqtaý kerek dep oılaımyn», dedi B.Beısenǵalıev.