Búginde óńirde 144 kitaphana jumys isteıdi
24 qazan – kitaphanashylar kúni. Almatyda qyzmetkerlerdiń tól merekesine oraı úzdik mamandar marapattaldy, dep habarlaıdy almaty-akshamy.kz.
Osy salada birneshe jyldan beri jumys istep júrgenderdiń eńbegi elendi. Olar Almaty oblysy ákimi men Mádenıet jáne aqparat mınıstrligi atynan alǵys hat pen qurmet gramotasyn aldy.
Eske salsaq, mereke ótken jyly Úkimet qaýlysynyń buıryǵymen kitaphanashylar kúni bolyp bekitilgen edi. Bıyl ekinshi márte atalyp ótip jatyr.
– Bári ınternetke aýysyp ketti, biraq ol máńgilik emes. Al kitap – rýhanı azyq. Kitaphana – bilim shańyraǵy. Tarıh, mádenıet, ádebıet, shejire kitaphanada saqtalǵan, –dedi Balqash aýdandyq kitaphanasynyń dırektory Núrıa Qapsalanova.
İs-sharany Almaty oblystyq mádenıet, arhıvter jáne qujattama basqarmasy uıymdastyryp otyr. Búginde óńirde 144 kitaphana jumys isteıdi. Bıyl 10 jańadan ashylǵan. Aldaǵy ýaqytta aımaqta zaǵıp jandarǵa arnalǵan kitaphana ashý josparlanǵan. Qyzmetkerler qosymsha jumys oryndarymen qamtylmaq.
– Qazaqtyń qasıetti qara shańyraǵy Almaty qalasynyń tórindegi Ulttyq kitaphanamen birlesip, Kitaphanashylar kúnine oraı ıgi shara uıymdastyrylyp otyr. Kitap qaı ýaqytta da qundylyǵyn joǵaltpaǵan. Aldaǵy ýaqytta jańa mádenıet úıi salynyp jatyr. Janynan kitaphana ashý josparda bar, –dedi Almaty oblysy Mádenıet, arhıvter jáne qujattama basqarmasynyń basshysy Danıar Álıev.