QR aýyl sharýashylyǵy vıse-mınıstri Azat Sultanov Úkimet otyrysynda bıylǵy 11 aıda aýyl sharýashylyǵy jalpy óniminiń kólemi 11,6% jyldyq josparmen 13,4%-ǵa artyp, 7,8 trln teńgeni quraǵanyn habarlady.
Onyń aıtýynsha, bul ósim ósimdik sharýashylyǵyndaǵy óndiris kólemin 19,9%-ǵa, mal sharýashylyǵynda 3,2%-ǵa ulǵaıtý esebinen qamtamasyz etilgen, dep habarlaıdy aqshamnews.kz.
«Ósimdik sharýashylyǵynda ortasha ónimdilik gektaryna 16,1 sentner bolǵanda 26,7 mln tonna astyq jınaldy, onyń ishinde bıdaı – 19,8 mln tonna, kúrish – 563 myń tonna. Sondaı-aq 2,9 mln tonna kartop, 3,9 mln tonna kókónis, 3,2 mln tonna maıly daqyldar jáne 300 myń tonna maqta jınaldy. Mal sharýashylyǵynda soıys salmaqta et óndirisiniń 4%-ǵa, sıyr sútiniń 4,4%-ǵa jáne taýyq jumyrtqasynyń 1,2%-ǵa óskeni baıqaldy», — dep naqtylady Azat Sultanov.
Aýyl sharýashylyǵynda óndiristiń ósýi tabıǵı-klımattyq jaǵdaılardyń qolaıly bolýy jáne Úkimettiń egis jumystaryn qarjylyq jáne materıaldyq-tehnıkalyq qamtamasyz etý sharalaryn ýaqytynda qabyldaýy esebinen qamtamasyz etildi. Alǵash ret kóktemgi egis jumystaryna beriletin jeńildetilgen kredıt kólemi 3 esege ulǵaıtylyp, jyldyq taza 5%-ben rekordtyq 580 mlrd teńgege deıin jetkizildi. Osyndaı qarjylaı qoldaýdyń arqasynda astyqtyń kóp mólsherde jınalýyna baılanysty engizilgen mıneraldy tyńaıtqyshtar kólemi 1,2 mln.tonnany qurady, bul ótken jyldyń deńgeıinen 2 ese joǵary boldy, aýyl sharýashylyǵy tehnıkasyn jańartý deńgeıi 5,5%-ǵa deıin jetkizildi.
Atalǵan kezeńde tamaq ónimderiniń óndirisi 2,1%-ǵa artyp, shamamen 3 trln teńgeni qurady. Atap aıtqanda, kelesideı ımportqa táýeldi ónim túrleriniń ósimi baıqaldy, irimshik pen súzbe 8,7%-ǵa, shujyq ónimderi 4,1%-ǵa, sary maı 2,9%-ǵa jáne ósimdik maıy 12%-ǵa ósti.
«Jyldyń sońyna deıin dándi daqyldardy, maıly daqyldardy óńdeý esebinen jáne qant óndirý esebinen osy salada joǵary kórsetkishterge qol jetkizemiz dep oılaımyz. Salanyń damý qarqynynyń tómendeýine jol bermeý maqsatynda kelesi jyly kóktemgi egis jáne egin jınaý jumystaryn qarjylandyrý kólemi 700 mlrd teńgege, aýyl sharýashylyǵy tehnıkasynyń jeńildetilgen lızıńi 200 mlrd teńgege jetkiziletin bolady. 1,9 mln tonna mıneraldy tyńaıtqyshtardy engizý jáne elıtalyq tuqymdar úlesin 10,5%-ǵa ulǵaıtý josparlanýda», — dep tolyqtyrdy vıse-mınıstr.
Onyń aıtýynsha, 1 jeltoqsanǵa respýblıkalyq búdjetten bólingen qarajattyń ıgerilýi 79%-dy qurady. Jyl sońyna deıin qarajat tolyq ıgeriletin bolady.