Elde tuńǵysh ret aýyl mektepteriniń oqýshylaryna arnalǵan respýblıkalyq pándik olımpıada bastaldy, dep habarlaıdy almaty-akshamy.kz «Habar 24»-ke silteme jasap.
Oǵan 90 myńǵa jýyq oqýshy qatysady. Baıqaý 3 kezeńnen turady. Aqtyq synǵa myńǵa jýyq bala irikteledi. 9-11 synyp oqýshylary 13 pán boıynsha bilimin synaıdy. 3-shi kezeń qorytyndysy kóktemde málim bolady dep kútilip otyr.
Negizgi maqsat – aýyl mektepteriniń qabiletin anyqtap, qoldaý kórsetý. Test onlaın formatta ótedi. Oqýshynyń áreketi beınebaqylaý kamerasymen qadaǵalanady jáne qazylar alqasyna olardyń aty-jóni jasyrylady.
Ǵanı Beısembaev, QR Oqý-aǵartý mınıstri: - Bul – aýyl mektepterindegi bizdiń oqýshylarymyzǵa teń múmkindik týdyrtý, jáne olardyń da bilimin ashyq kórsetýge jaǵdaı jasaý, motıvasıa berý. Bizdiń eń jetistigimiz – bolashaqta osy olımpıadanyń negizinde aýyl mektepterinen shyqqan respýblıkalyq olımpıada jeńimpazdaryn arnaıy daıyndyqtan ótkizip, olardyń da halyqaralyq olımpıadaǵa qatysýǵa múmkindigin arttyrý.
Ǵajdenbek Tursynov, «Daryn» respýblıkalyq ǵylymı-praktıkalyq ortalyǵynyń dırektory: - Oqytý baǵdarlamasy ártúrli bolǵandyqtan, aýyldyń balalarynyń respýblıkalyq olımpıadanyń qorytyndy kezeńine ótýge múmkindigi bolmaı jatady. Osyny boldyrmas maqsatynda tuńǵysh ret aýyl balalaryna arnalǵan osyndaı olımpıadany ótkizip otyrmyz. Jalpy árbir fınalıst balany oqý-jattyqtyrý jıynyna shaqyryp, syrttaı oqý mektepterine shaqyramyz.