Elimizdiń azamattyq avıasıasyn damytý máselesi qaraldy
IIDM vıse-mınıstri Berik Kamalıevtiń tóraǵalyǵymen azamattyq avıasıany damytý máseleleri boıynsha salalyq keńes ótti, dep habarlaıdy Almaty-akshamy.kz
İs-sharaǵa Azamattyq avıasıa komıtetiniń, «Qazaqstannyń avıasıalyq ákimshiligi» AQ, avıasıa kásiporyndarynyń, «Atameken» UKP, shaǵyn avıasıa qaýymdastyǵy ókilderi men sala ardagerleri qatysty.
Ótken jyldyń qorytyndylary men 2022 jylǵa arnalǵan josparlar talqylanǵan keńes barysynda IIDM Azamattyq avıasıa komıteti ushý qaýipsizdigi deńgeıin, ishki jáne halyqaralyq áýe qatynasyn arttyrý, áýe kóligi ınfraqurylymyn jańǵyrtý baǵytynda atqarylyp jatqan jumystar jóninde baıandady.
Komıtet tóraǵasy Talǵat Lastaev keltirgen derekter boıynsha, IKAO-nyń Úılestirilgen valıdasıalyq mısıasy sheńberinde halyqaralyq aýdıtorlardyń táýelsiz tekserýi qorytyndysynda Qazaqstan ushý qaýipsizdigin qamtamasyz etý deńgeıin 84%-ǵa deıin kóterdi. Bul - ortasha álemdik kórsetkishten 15% joǵary.
Zańnamalyq jumystar sheńberinde ushqyshsyz ushatyn apparattardy paıdalanýdy retteý normasyn, atap aıtqanda, sertıfıkattaý rásimin engizý, qashyqtyqtan sáıkestendirýge qoıylatyn talaptardy belgileý jáne olardy paıdalanatyn aımaqtardy aıqyndaý qarastyrylýda.
Sondaı-aq, áýe kompanıalaryna ushýǵa shekteý qoıylatyn adamdardyń jeke tizimin jasaýǵa múmkindik beretin norma engizilmek. Oǵan ushaqta tártip buzǵan jáne onysy zańmen dáleldengen adamdar ǵana enýi tıis.
Elimizde áýe kóligi ınfraqurylymyn jańǵyrtý aıasynda qazir 6 nysanda jumystar júrip jatyr. Olar - Shymkent áýejaıynyń jańa termınalynyń qurylysy, Oral áýejaıynyń termınalyn, Qostanaı áýejaıynyń aerovokzal keshenin, Óskemen áýejaıynyń ushý-qoný jolaǵyn, Úrjar jáne Úsharal áýejaılaryn jańǵyrtý jobalary.
Keńeste salany áýe otynymen qamtamasyz etý, tarıftik saıasat jáne mamandarǵa qatysty máseleler talqylandy. Jyl saıyn munaı óńdeý zaýyttaryndaǵy jóndeý jumystaryna baılanysty avıaotyn tapshylyǵy týyndaıdy. Qazir jaǵdaı birshama turaqtandy, alaıda máseleni júıeli sheshý úshin QR IIDM qysqa jáne uzaq merzimdi perspektıvaǵa usynystar daıyndap, olardy QR Energetıka mınıstrligimen birge pysyqtaýda.
Aldaǵy eki jylda ushý qaýipsizdigi standarttaryna sáıkestik deńgeıin 90%-dan asyryp, IKAO aýdıtinen sátti ótý negizgi mindet bolyp otyr. AQSH-qa tikeleı reıster ashý sheńberinde Qazaqstannyń avıasıalyq ákimshiligi men AQSH-tyń kólik qaýipsizdigi ákimshiligi arasyndaǵy yntymaqtastyq jalǵasady.
Sondaı-aq, «Qýatty óńirler - el damýynyń draıveri» ulttyq jobasy aıasynda álemdegi epıdemıologıalyq jaǵdaıdyń jaqsarýyna jáne ınfraqurylymdyq obektilerdiń jańǵyrtylýyna qaraı pandemıaǵa deıingi deńgeıdegi halyqaralyq qatynasty qalpyna keltirý jumystary jalǵasady.