Almatydaǵy jekemenshik emhanalardyń birinde 55 jastaǵy er adam qaıtys boldy. Marqumnyń týystarynyń aıtýynsha, otadan keıin er adamda anafılaktıkalyq shok bolǵan, dep habarlaıdy Almaty-akshamy.kz QazAqparatqa silteme jasap.
Qaıǵyly oqıǵa týraly aqparat áleýmettik jelide tarady.
Jazba avtorynyń aıtýynsha, er adamnyń eki tisin julyp, ımplant ornatý kerek bolǵan. Alaıda marqumnyń balasynyń aıtýynsha, otadan keıin ákesinde anafılaktıkalyq shok bolǵan.
«Emhana qyzmetkerleriniń biliktiligi tómen, anafılaktıkalyq shok kezinde alǵashqy medısınalyq kómek kórsetpegen. Olar adamdy qutqarýǵa bolatyn qundy ýaqytty jiberip aldy. Dárigerler oǵan shaı ishýdi usynǵan. Aýrýhanaǵa jetkizý kezinde "jedel járdemde" eshkim erip júrmegen, tamyr soǵysy toqtap qalǵan. Ol 55 jasta, deni saý, kóńildi adam edi.
Hırýrgpen, bas dárigermen sóılesken kezde, olardyń hattamalardy oryndamaıtyny belgili boldy: ota jasaýǵa kelisim alyp, naýqastarǵa taldaý jasamaıdy, operasıa aldynda kardıogram jasap, anestetıkterge test almaıdy. Barlyq kelisim tek sóz júzinde. Emhana qyzmetkerleri qabiletsiz, olardyń salǵyrttyǵynan ákem qaıtys boldy», - delingen jazbada.
Er adam ortalyq qalalyq klınıkalyq aýrýhanaǵa jetkizilgen.
Medısına mekemesi baspasóz qyzmetiniń málimetinshe, aýrýhanaǵa túsken kezde naýqas klınıkalyq ólim jaǵdaıynda bolǵan.
«Naýqas ortalyq qalalyq klınıkalyq aýrýhananyń jedel járdem bólimine klınıkalyq ólim jaǵdaıynda anafılaktıkalyq shok dıagnozymen tústi. Púls joq, júrek soǵysy estilmedi. 30 mınýt reanımasıa júrgizildi, biraq, ókinishke qaraı, aman alyp qala almadyq. Júrek jumysyn qalpyna keltirý múmkin bolmady», - dep habarlady ortalyq qalalyq klınıkalyq aýrýhananyń baspasóz qyzmeti.