Bilim salasyndaǵy reformalar jalǵasýda: SQÝ bazasynda Arızona ýnıversıtetiniń fılıalyn ashý josparlanyp otyr
QR Bilim jáne ǵylym vıse-mınıstri Qýanysh Erǵalıev Arızona ýnıversıtetiniń prezıdenti doktor R. Robbınspen jáne AQSH-tyń Arızona shtatyndaǵy Ókilder palatasynyń spıkeri R.Baýerspen onlaın-kezdesý ótkizdi, dep habarlaıdy Almaty-akshamy.kz QazAqparatqa silteme jasap
Bul jańalyqty atalǵan vedomstvonyń baspasóz qyzmeti habarlaǵan.
Kún tártibinde strategıalyq seriktestik jáne Qozybaev atyndaǵy SQÝ bazasynda Arızona ýnıversıtetiniń fılıalyn ashý máseleleri talqylandy. Esterińizge sala keteıik, osyǵan deıin Prezıdent Qasym-Jomart Toqaev sheteldik joǵary oqý oryndarynyń fılıaldaryn ashý boıynsha jumys júrgizýdi tapsyrǵan bolatyn.
Kezdesý barysynda taraptar jobany jan-jaqty qoldaýǵa daıyn ekenin málimdedi jáne bilim berý sapasyn arttyrýdaǵy strategıalyq seriktestiktiń mańyzdylyǵyn atap ótti. Vıse-mınıstr Q. Erǵalıev atalǵan jobany iske asyrý úshin normatıvtik-quqyqtyq qujattarda qabyldanǵan ózgerister týraly aıtyp berdi. Taraptar bilim berý qyzmetin júzege asyrý, oqytýshylyq qyzmetke sheteldik ǵalymdardy tartý tártibin jáne lısenzıalaý máselelerin talqylady.
Bilim salasy, IT, ınjenerıa, agro-tehnıkalyq jáne t. b. baǵyttar boıynsha oqytý AQSH-ta akkredıttelgen bilim berý baǵdarlamalary boıynsha aǵylshyn tilinde júrgiziledi degen ýaǵdalastyq bar. Negizgi basymdyq qosdıplomdy baǵdarlamalar men birlesken ǵylymı zertteýlerdi damytýǵa berilip otyr.
Sondaı-aq halyqaralyq profesorlar men bıznes-qaýymdastyq ókilderi jumyldyrylady. Endi 2022 jyldyń qyrkúıeginen bastap Arızona ýnıversıtetimen birlesken jumysty bastaý úshin strategıalyq yntymaqtastyqty bekitetin normatıvtik quqyqtyq qujatty qabyldaý kerek. Elimizde sheteldik oqý oryndarynyń kampýstaryn ashý stýdentterdiń syrtqa ketýin azaıtyp, qazaqstandyq joǵary bilim júıesine álemdik standarttar men jańa ádistemeler engizýge múmkindik beredi. Otandyq oqý oryndary arasyndaǵy básekelestik artady.
Esterińizge sala keteıik, Bilim jáne ǵylym mınıstrligi, M.Qozybaev atyndaǵy Soltústik Qazaqstan ýnıversıteti men Arızona ýnıversıtetteri arasyndaǵy yntymaqtastyq jónindegi Memorandýmǵa 2021 jyly qol qoıylǵan bolatyn.