Elimizdiń Qorǵanys mınıstri Jambyl oblysyndaǵy «Mátibulaq» polıgonynda «ArHO – 2021» konkýrstaryna qatysýshylardy quttyqtady.
Qorǵanys mınıstrliginiń dereginshe, general-leıtenant Nurlan Ermekbaev Qazaqstan Respýblıkasynyń aýmaǵynda ótetin Armıalyq halyqaralyq oıyndardy resmı túrde ashyq dep jarıalady, dep habarlaıdy Almaty-akshamy.kz.
Qorǵanys vedomstvosynyń basshysy konkýrstarǵa qatysýshylar aldynda sóılegen sózinde Armıalyq halyqaralyq oıyndardyń aýqymy keń, iri álemdik birinshilikpen bir deńgeıde ekenin atap ótti.
«Armıalyq oıyndardaǵy saıystar – bul nysanany zaqymdaýda dáldik pen mergendikti, ártúrli qarýdy meńgerýde sheberlikti, minsiz dene daıyndyǵy men tózimdilikti, áskerı tehnıkany basqarýdaǵy senimdi daǵdylardy kórsetý. Oıyndar áskerı qyzmetshilerdi beıtanys jerde, psıhoemosıonaldyq shıelenis jaǵdaıynda áreket etýge májbúrleýmen de qyzyqty», – dep atap ótti Qorǵanys mınıstri.
Jeti jyl ishinde Armıalyq halyqaralyq oıyndarǵa qatysýshy elderdiń sany 17 memleketten 44-ke deıin artty. Saıystar túri de kóbeıýde. Konkýrstardyń barlyq kezeńi qatysýshylardan komanda quramynda áreket etý kezinde tózimdilikti, eptilikti, dáldik pen sheberlikti talap etetin qazirgi zamanǵy shynaıy urys jaǵdaıyna barynsha jaqyndatylǵan.
Armıalyq oıyndardyń jaýyngerlik mashyqty arttyrýdaǵy mańyzyn atap ótken general-leıtenant Nurlan Ermekbaev:
«Áskerı qyzmetshiler oqý-jattyǵýlar nemese jarystar ýaqytynda naqty jáne úılesimdi áreket etse, onda olardyń keminde 80%-i jaýyngerlik jaǵdaıda da dál osylaı áreket etetinin óz isin jete meńgergen kásibı áskerıler jaqsy biledi», – dedi.
Bıyl Jambyl oblysyndaǵy 40-ynshy áskerı bazanyń aýmaǵynda armıalyq oıyndardyń 2 konkýrsy – mınaatqyshtar eseptoptary arasyndaǵy «Artılerıadan oq atý sheberi» jáne UUA mamandarynyń «Suńqar ańshylyǵy» saıystary ótedi. Qazaqstan jaýyngerleri áskerı saıystarda árdaıym joǵary nátıjeler kórsetip, osy konkýrstarda udaıy alda bolyp keledi.
Oıyndarǵa qatysý úshin «Mátibulaq» polıgonyna 8 elden artıllerıster jáne 4 memleket armıasynan ushqyshsyz ushý apparattarynyń eseptoptary keldi. Konkýrstarǵa 3 elden kelgen ókilder baqylaýshy retinde qatysady.
«Qazaqstan – beıbit saıasatty ustanatyn memleket. Osyndaı jarystardyń arqasynda biz jaýyngerlik daıarlyqtyń kúshti jáne álsiz jaqtaryn aıqyndap, sheberlikti odan ári shyńdap, onyń tıimdiligin arttyra alamyz. Bul beıbit damýdy maqsat etken búkil adamzat damýynyń progresıvti joly. Munda áskerı qyzmetshiler urys dalasynda emes, sport saıystarynda kúsh synasady. Alaıda, Qazaqstan armıasy eldiń egemendigi men qaýipsizdigin qorǵaýǵa qabiletti dep senimmen aıta alamyn. Daıarlyqty joǵary deńgeıde ustaý úshin Armıalyq halyqaralyq oıyndarǵa daıyndyq barysynda da, ony ótkizý kezinde de jattyǵamyz», – dedi qorytyndy sózinde general-leıtenant Nurlan Ermekbaev.
El aýmaǵynda ótip jatqan Armıalyq halyqaralyq oıyndar aǵymdaǵy jylǵy 2 qyrkúıekke deıin jalǵasady.