Elimizde jer qoınaýyn ıgerýge arnalǵan alǵashqy elektrondy aýksıon ótkiziledi
1 tamyzda E-Qazyna.kz platformasynda qatty paıdaly qazbalardy (QPQ) barlaýǵa quqyq beretin elimizdegi alǵashqy elektrondy aýksıon uıymdastyrylady, dep habarlady Almaty-akshamy.kz QazAqparatqa sálteme jasap.
Indýstrıa jáne ınfraqurylymdyq damý mınıstrliginiń málimeti boıynsha, osyǵan deıin paıdaly qazbalar boıynsha mundaı formatta aýksıon ótkizilmegen.
Elimizdiń mıneraldy-shıkizat bazasyn tolyqtyrýǵa arnalǵan saýdany uıymdastyrý úshin aýqymdy jumys júrgizilip, ony ótkizýdiń erejeleri jan-jaqty qaralyp, tetigi ázirlendi. Barlyq ýchaske týraly aqparat Qazaqstan kartasynda kórnekilenip, sondaı-aq statısıkalyq málimet pen basqa da derekter blogy qarastyrylǵan. Elektrondy aýksıon jer qoınaýy ıgerý baǵytyn damytyp, ınvestısıalyq tartymdylyqty arttyrýda mańyzdy qadam bolyp sanalady.
Osy ýaqytqa deıin memleket QPQ ken oryndaryn ıgerýge quqyq beretin dástúrli aýksıondardy ótkizip kelgenin aıta keteıik. Endi tamyzdan bastap saýda formaty onlaın rejimde qolǵa alynyp, aýksıon álemniń kez kelgen jerinen qol jetimdi bolady. Budan basqa aýksıonǵa qatysýshylar bir-birin kórmeıdi. Demek qandaı da bir ýaǵdalastyqty aldyn alyp, qatysýshylar arasyndaǵy básekelestikti arttyrady. Nátıjesinde memlekettik qazynany tolyqtyrý úshin neǵurlym tıimdi usynystarǵa jol ashylady.
Atalǵan aýksıon 1 tamyzda saǵat 10:00-den bastalady. Eger de saýda lottar jabylǵanǵa deıin qarqyn alsa, onda 17:00-ge (AST) deıin jalǵasady.