Oqý-aǵartý mınıstrligi Aıtys aqyndary men jyrshy-termeshilerdiń halyqaralyq odaǵymen birlesip «Egemendigim - eldigim» taqyrybynda respýblıkalyq «Qola dombyra» oqýshylar aıtysyn uıymdastyrdy.
Oǵan elimizdiń 20 óńirinen 12-18 jas aralyǵyndaǵy 22 jas aqyn qatysty, dep habarlaıdy aqshamnews.kz Oqý-aǵartý mınıstrligine silteme jasap.
Oqý-aǵartý mınıstri Ǵanı Beısembaev aıtys ulttyq qundylyqtarymyzdy aqyndyq óner arqyly jas urpaqqa nasıhattaý ǵana emes, sondaı-aq oqýshylardy adal, sanaly, jasampaz azamat retinde tárbıeleýdiń rýhanı quraly dep atap ótti.
«Memleket basshysynyń Ulttyq quryltaıdyń «Ádiletti Qazaqstan – adal azamat» atty ekinshi otyrysynda aıtqan mańyzdy maqsattarynyń birine qol jetkizý úshin mınıstrlik jalpyadamzattyq jáne ulttyq qundylyqtar, patrıotızm men eńbekqorlyq qaǵıdattaryna negizdelgen «Birtutas tárbıe» baǵdarlamasy aıasynda birqatar sharalardy júzege asyrýda. Kez kelgen eldiń birligi men órkendeýi ulttyq tárbıe men rýhanı qundylyqtardy dáripteýge baılanysty. Aıtys – óner saıysy ǵana emes, jastarymyzdyń shyǵarmashylyq, rýhanı-mádenı áleýetin damytatyn, estetıkalyq tárbıe júıesin jetildiretin mańyzdy alań», - dedi Ǵanı Beısembaev.
Aıta ketý kerek, aıtys «Birtutas tárbıe» baǵdarlamasy aıasynda bekitilgen «Tórt toqsan – tórt óner» ulttyq mádenı-aǵartýshylyq jobasynyń alǵashqy toqsanyn qorytyndylaıdy.
Aıtystyń jeńimpazdary men júldegerleri:
Bas júlde jáne «Qola dombyra» ıegeri – Islam Álı Birjanuly (Shymkent qalasy);
I oryndy Beıbit Baıjigit (Mańǵystaý oblysy) ıelendi;
II oryndy Araı Nuradın (Aqtóbe oblysy), Aıǵanym Maqsuthanova (Astana qalasy) bólisti;
III oryn – Raýan Nurshabekov (Almaty oblysy), Nurıslam Rogatov (Qostanaı oblysy), Erasyl Seıitjanuly (Almaty qalasy).
Barlyq qatysýshylarǵa alǵys hattar men qarjylaı syıaqylar tabys etilip, jas aqyndardyń tálimger-ustazdaryna QR Oqý-aǵartý mınıstriniń alǵys haty berildi. Sondaı-aq jas aqyndar arnaıy júldelermen de marapattaldy. «Qola dombyra» oqýshylar aıtysynyń jyl saıynǵy jeńimpazyna L.Gýmılev atyndaǵy Eýrazıa ulttyq ýnıversıtetiniń bilim granty beriledi.