Sheteldik áleýmettik jeliler zańdy ókilderin belgilep, taǵaıyndaý jumystaryn júrgizip jatyr
QR Aqparat jáne qoǵamdyq damý mınıstrliginiń resmı saıtynda kıberbýllıngke qarsy norma týraly alypqashpa áńgimelerge túsinikteme berilgen aqparat jarıalandy, dep habarlaıdy Almaty-akshamy.kz.
«BAQ pen áleýmettik jelide qabyldanatyn zań jobasy qyzý talqylanyp jatyr. Biraq jarıalanymdardaǵy aqparat túbegeıli emes ekenin atap ótemiz. QR Parlamenti Májilisi ekinshi oqylymda maquldaǵan Balalardyń quqyqtaryn qorǵaý týraly zań jobasynda sheteldik onlaın-platformalardyń Qazaqstanda tirkelýin mindetteıtin norma joq.
Ondaı norma zań jobasynyń bastapqy nusqasynda bolǵan jáne 2021 jyldyń 15 qyrkúıegindegi birinshi oqylymda qaralǵan. Osy zań jobasy boıynsha ótken jalpy otyrysta atalǵan qujatqa baılanysty, onyń ishinde osy aıtylǵan norma boıynsha eskertpeler aıtylǵan.
Zań jobasy boıynsha qurylǵan jumys tobynyń otyrystary aıasynda birneshe norma qaıta qaraýdan ótti. Sol kezde sheteldik onlaın platformalardyń fılıalyn nemese ókildigin ashý talaby BAQ salasyndaǵy ýákiletti organmen ózara áreket etetin ýákiletti ókildi taǵaıyndaý talabyna aýystyryldy. Mundaı talap bir aıdyń ishinde Qazaqstan aýmaǵynda 100 myńnan astam qoldanýshyǵa qoljetimdi bolǵan sheteldik áleýmettik jeliler men messendjerlerge ǵana qatysty», - delingen resmı málimdemede.
Vedomstvonyń aqparaty boıynsha, zıandy kontentti óshirýdiń ýaqytsha shekteýlerin belgileıtin norma engizý ádette masqaralaý áreketteri jabyq toptar men qaýymdastyqtarda kezdesetinimen baılanysty bolyp otyr.
«Ondaı jabyq toptarǵa kirmeı faktilerdi anyqtaý múmkin emes. Áleýmettik jelide tanymal bolyp ketken sýısıd toptary týraly bári biledi. Monıtorıń ol toptarda jetkinshekterdi sýısıdke ıtermeleıtin materıaldardyń kóp ekenin anyqtaǵan bolatyn.
Mınıstrlik áleýmettik jelide zańǵa qaıshy materıaldardy joıýǵa birneshe aı jumsady. Monıtorıń qazir áleýmettik jelide jetkinshekterge baǵyttalǵan jańa toptardy anyqtap jatyr.
Búginde ýákiletti organnyń uıǵarymdaryn áleýmettik jeliler uzaq qaraıdy. Saldarynan zıandy kontenttiń ózektiligi joıylyp, balalarǵa zıany tıip úlgeredi. Sondyqtan bul túzetýler áreketinde kıberbýllıng sıpaty joq qarapaıym qoldanýshylarǵa eshqandaı keri áser etpeıdi», - dep jazylǵan mınıstrliktiń resmı saıtynda.
Mınıstrlik ókilderi atalǵan normany engizer kezde halyqaralyq tájirıbeni zerttegen kórinedi.
«Sonyń qorytyndysy boıynsha álemdik qaýymdastyq bul salany zańnamalyq turǵyda retteýge talpynyp jatqany málim boldy. Mysaly, Eýropanyń keıbir elderinde ınternet-keńistikti jergilikti zańnamany eskere otyryp quqyqtyq retteıtin norma engizilgen.
Sondaı-aq, Eýropanyń, Azıanyń, Ońtústik jáne Soltústik Amerıkanyń elderinde áleýmettik jeliler men messendjerlerdi zańnamamen retteý jumystary júrip jatyr. Iaǵnı, búkil álem problemanyń mańyzdylyǵyn túsinip, tıisti jumys atqarýda. Mınıstrlik keıingi jyldary halyqaralyq áleýmettik jelilerdiń menshik ıelerimen baılanysty jolǵa qoıyp jatyr. «VKontakte», «Odnoklassnıkı», «Mail.ru», «Livejournal», «Facebook», «Instagram», «Tik tok», «linkendin» áleýmettik jelileriniń jáne «Telegram» messendjeriniń ókilderimen kelissózder júrgizildi. Olar bul bastamany jaǵymdy qabyldap atalǵan normalardy oryndaýǵa kelisetinderin bildirdi», - delingen málimette.
Vedomstvonyń aqparaty boıynsha, qazirgi tańda sheteldik áleýmettik jeliler zańdy ókilderin belgilep, taǵaıyndaý jumystaryn júrgizip jatyr.
«Jalpy ınternet-kompanıalardyń ókilderi Qazaqstan Respýblıkasy men halyqaralyq quqyq talaptaryn buzatyn zańǵa qaıshy kontentti óshirý boıynsha áriptestik ornatý týraly bastamaǵa túsinistikpen qaraıdy.
Onyń ústine Qazaqstan Respýblıkasynyń zańnamasynda senzýraǵa tyıym salynǵanyn aıta ketý kerek. Sáıkesinshe, usynylyp otyrǵan normalar halyqaralyq quqyq pen Qazaqstannyń qoldanystaǵy zańnamasyna qaıshy kelmeıdi.
Zańnamadaǵy jańashyldyq mınıstrlikke áleýmettik jeliler men messendjerlerdiń erkin qyzmetine kedergi keltiretin jáne óz oıyn bildirý erkin shekteıtin quzyret júktemeıdi, - delingen mınıstrliktiń túsindirmesinde.