Bul sala – memleketimizdiń qarjy-ekonomıkalyq ál-aýqatynyń kepili.
Bul týraly QR Indýstrıa jáne ınfraqurylymdyq damý vıse-mınıstri Marat Qarabaev Astana Mining & Metallurgy-2022 aıasynda ótken İİİ Qazaqstannyń Altyn óndirýshileriniń forýmynda aıtty, dep habarlaıdy Almaty-akshamy.kz.
Alqaly basqosýda elimizdiń taý-ken kesheni salasyna ınvestorlardy tartý úshin zańnamany jetildirý, qundy metaldar naryǵy salasyn qoldaý boıynsha álemde qalyptasqan úrdister, salyqtyq jeńildikter men artyqshylyqtar, altyn óndirý jobalarynyń ınvestısıalyq tartymdylyǵyn arttyrý úshin salyq rejımderin qolaıly etýge yqpal etý máseleleri jan-jaqty talqylandy.
Marat Qarabaev óz sózinde qazaqstandyq altyn óndirisi salasynyń strategıalyq mańyzdylyǵyna toqtaldy. Onyń aıtýynsha, bul sala – memleketimizdiń qarjy-ekonomıkalyq ál-aýqatynyń kepili.
«Elimizde 400 tonnadan astam altyn qory bar. Qazaqstan altyn qory boıynsha álemde on ekinshi orynda. Bizdiń altyn óndirýshiler elimizdiń ekonomıkalyq turaqtylyǵyn saqtaýǵa aıtarlyqtaı úlesin qosyp otyr. Bul memleket pen bıznestiń ózara yqpaldastyǵynyń nátıjesinde qol jetkizildi. Óz kezeginde «Baǵaly metaldar men asyl tastar týraly» jańa zań da salanyń damýyna tyń serpin bergenin atap ótý kerek. Atalǵan zań altyn óndirýdiń barlyq kezeńin elimizde júzege asyrýǵa múmkindik berdi», – dedi vıse-mınıstri.
Osy rette aıta keteıik, ótken jyly Qazaqstanda 33 mln tonna ken jáne 66 tonna tazartylǵan altyn óndirilgen.
Qazirgi kúnde elimizde 3 altyn tazartý zaýyty jumys isteıdi. Onyń ekeýi London metal bırjasynyń Good Delivery statýsyna ıe. Bul – qazaqstandyq altyn quımasynyń álemdik deńgeıde moıyndalǵanynyń aıqyn nyshany.
Marat Qarabaevtyń aıtýynsha, Qazaqstannyń resýrstyq bazasynyń aıtarlyqtaı keńdigi – salanyń óndiristik qýattylyǵyn ulǵaıtýǵa zor múmkindik beredi. Máselen, búgingi tańda 1 trln teńge qarjy tarta otyryp jyl saıyn 12 tonna arfınarlyq altyn shyǵarý áleýeti bar jáne 2 600 turaqty jumys ornyn qamtıtyn11 jobany iske asyrý josparlanyp otyr. Óz kezeginde bul bastama elimizdiń áleýmettik-ekonomıkalyq salasynyń damýyna tyń serpin bermek.