Búginde Almaty, Astana qalalary men Almaty, Jetisý jáne Qaraǵandy oblystarynyń 36 JOO men kolejderiniń 4 myńǵa jýyq stýdenti «Meniń baýyrym» jobasyna qatysýda.
Eriktiler qataryna pedagog, psıholog, áleýmettik pedagog, zańger, IT mamandyqtary boıynsha bilim alýshy 3-4 kýrs stýdentteri qosyldy, dep habarlaıdy Almaty-akshamy.kz QR Oqý-aǵartý mınıstrligine silteme jasap.
Stýdentter elimizdiń 217 mektebinde erikti bolyp qyzmet atqarýda. Jobany iske asyrýda túrli jáne tıimdi tásilder qoldanylady. Ásirese zertteý júrgizýge erekshe kóńil bólinýde, onyń ishinde týǵan jerdi, ekologıany zerdeleý, sondaı-aq jobalar boıynsha zertteý qorytyndysyn tanystyrýdy eriktiler qyzmetin qorytyndylaý sekildi mektepishilik sharalarmen oraılastyrý josparlanýda. Sonymen qatar sheberlik synyptary, fleshmobtar, chellendjder, sporttyq týrnırler, qaıyrymdylyq aksıalary, tok-shoý jáne TEDX formatyndaǵy synyptan tys is-sharalar qarastyrylǵan. Bul jumys túrleri jobaǵa qatysýshylardyń damýyna yqpal etetin ınteraktıvti jáne jan-jaqty bilim berý ortasyn qurýǵa baǵyttalǵan.
«Bul túrli jastaǵy adamdardy biriktiretin respýblıkalyq aýqymdaǵy biregeı áleýmettik joba. Onyń ishinde pedagogter, stýdentter, balalar men ata-analar bar. Bul joba barlyǵyna paıdaly bolady jáne bolashaqtyń mektebin qurý úshin kúsh biriktirýge múmkindik beredi, onda árkim óziniń qajetti jáne mańyzdy ekenin sezinip, boıyndaǵy úzdik qarym-qabiletterin ashady», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aıta keteıik, joba ótken jyldyń qarasha aıynda Oqý-aǵartý mınıstrligi men Ǵylym jáne joǵary bilim mınıstrligi tarapynan mektep oqýshylary úshin qolaıly jáne damytýshy bilim berý ortasyn qurýǵa yqpal etý maqsatynda bastalǵan bolatyn. «Meniń baýyrym» degen sózdiń maǵynasy tek qorǵaý ǵana emes, sondaı-aq rýhanı qoldaý degendi de bildiredi.