Mınıstr kadr máselesi qalaı sheshiletinin aıtty
Úkimet otyrysynda Ǵylym jáne joǵarǵy bilim mınıstri Saıasat Nurbek pedagogtardy daıyndaý máselesi jaıly aıtty, dep habarlaıdy almaty-akshamy.kz.
«Pedagogtarǵa degen suranys jyldan jylǵa artyp kele jatyr. Oqý-aǵartý mınıstrliginiń málimetinshe, 2023 jyly muǵalimderge degen qajettilik 3 myńnan astam adamdy quraıdy. Mınıstrlik osy kadr tapshylyǵy máselesin jan-jaqty zerdeledi. Bizdiń aldaǵy 4 jylda bitirip shyǵatyn túlektermen pedagogtarǵa degen suranysty qamtamasyz etemiz degen boljam bar. Tek kelesi jyly ǵana pedagog tapshylyǵy týyndaýy múmkin. Biraq biz ony bıylǵy bitirýshi túlekterdiń jáne magıstratýra túlekteriniń esebinen qamtamasyz etemiz. Osylaısha biz pedagogıkalyq kadrlardyń qajettiligin tolyǵymen jabamyz», - dedi ol.
Saıasat Nurbek ataǵandaı, osy saladaǵy grant sany 15 923-ke jetken.
«Memleket basshysynyń tapsyrmalaryn júzege asyrý aıasynda Pedagogıkalyq joǵary oqý oryndaryn akredıtteý standarty men 2029 jylǵa deıingi joǵary bilim men ǵylymdy damytý tujyrymdamasy bekitildi. Pedagogıkalyq baǵyttar boıynsha granttar sany sońǵy jyldary birneshe ese ósip, 15 923 birlikke jetti. Olardyń quny eki esege ósti. Stýdenttik shákirtaqy da ósti. Sonymen qatar muǵalimdik mamandyqtarǵa qabyldaý talaptary kúsheıtildi. Pedagogıkalyq joǵary oqý oryndarynyń bilim berý baǵdarlamalaryn jańartý boıynsha jumys jalǵasýda, búginde onyń 72%-y jańartyldy. Jalpy, osy jáne basqa da júrgizilip jatqan ózgerister pedagogıkalyq kadrlardy daıarlaý sapasyn arttyrýǵa jáne olardyń zaman talabyna beıimdelýine baǵyttalǵan», - dedi mınıstr.