Qazirgi kezde áýe kóligi salasynda 6 qazaqstandyq tasymaldaýshy 56 ishki baǵdar boıynsha aptasyna 706 reısti oryndap keledi. Bul týraly QR Indýstrıa jáne ınfraqurylymdyq damý vıse-mınıstri Almaz Ydyrysov aıtty, dep habarlaıdy almaty-akshamy.kz QazAqparatqa silteme jasap.
«İshki naryq jaıynda aıtatyn bolsaq, 2012 jyldan bastap barlyq shekteýler alynyp tastaldy. Iaǵnı ishki turaqty tasymaldaýǵa ruqsaty bar kez kelgen otandyq áýe kompanıasy ishki baǵdarlar boıynsha reısterdi qandaı da bir shekteýsiz oryndaı alady. Qazirgi kezde 6 qazaqstandyq tasymaldaýshy (Eır Astana, Fly Arystan, SCAT, Qazaq Air, Iýjnoe nebo, Jetisý) 56 ishki baǵdar boıynsha aptasyna 706 reısti oryndap keledi», - dedi A. Ydyrysov Senatta elimizdegi áýe kóligi máselelerine qatysty jıyn barysynda.
Sonymen qatar ol áýe baǵdarlaryn sýbsıdıalaý máselesine toqtaldy.
«Bul qadam 2002 jyldan beri qoldanylyp keledi, maqsaty - ortalyqty óńirlik áýe jelilerimen baılanystyrý. Bıyl ortalyqtan oblystarǵa (Jambyl, Pavlodar, Soltústik Qazaqstan, Aqmola, Aqtóbe, Túrkistan, Ulytaý) 21 áýe baǵdaryn sýbsıdıalaý úshin respýblıkalyq búdjetten 6,3 mlrd teńge somasynda qarajat bólindi. Reısterdi «SCAT», «Qazaq Air» jáne «Iýjnoe nebo» avıakompanıalary oryndaıdy. Tarıfter 10 000 teńgeden bastalyp (Jezqazǵan – Qaraǵandy) 33 000 teńgege deıin qurady (Túrkistan-Oral)», - dedi vıse-mınıstr.
Onyń sózine qaraǵanda, respýblıkalyq búdjetti naqtylaý nátıjesinde bıyl Astana – Jezqazǵan, Astana – Pavlodar, Qaraǵandy – Jezqazǵan, Kókshetaý – Shymkent jáne Taraz – Atyraý sıaqty jańa baǵyttardy ashý josparlanǵan.
«Osy jyly naýryz aıynda respýblıkalyq búdjetti naqtylaý aıasynda Astana-Pavlodar, Taraz-Atyraý, Kókshetaý -SHymkent avıamarshrýttaryn sýbsıdıalaý úshin 878 mln teńge somasynda qarajat bólindi», - dedi Almaz Ydyrysov.