Ortalyq qalalyq klınıkalyq aýrýhanaǵa 45 jyl buryn oń aıaǵynyń tize býynyna tigin mashınasynyń ınesi kirip ketken áıel tústi.
Áıeldiń aıtýynsha, bala kúninde jaraqattanǵan. Sol kezde ıneni alyp tastaý úshin operasıa jasalǵan, biraq ıne tabylmaǵan, dep habarlaıdy Almaty-akshamy.kz QazAqparatqa silteme jasap.
«Osy jyldar ishinde ıne mazamdy alǵan joq, bıyl ǵana qatty aýyryp, kúnnen-kúnge asqyna tústi. Aqsańdap júre bastadym. Sondyqtan, stasıonarǵa júgindim. Maǵan rentgen jasap, operasıa jasaý qajet ekeni aıtyldy», - dedi ol.
Aýrýhana travmatologtary ıneni alyp tastaý boıynsha jarty saǵatqa sozylǵan operasıa jasady. Operasıadan soń áıel aqsańdap júrýin qoıdy ári aýrýy basyldy.
Operasıany jasaǵan travmatolog Dáýlet Chýkmanovtyń aıtýynsha, kóp jyldar ishinde ıne ınkapsýlásıalanǵan.
«Operasıa sátti ótti, ıne alynyp tastaldy», - dedi ol. Óz kezeginde áıel dárigerlerge kásibıligi úshin alǵysyn bildirdi.