Ermurat Bapı Reseıdi synaǵan blogerlerdi bostandyqqa shyǵarýdy talap etti
"Petropavl qalasynda jýyrda bolǵan separatızm sıpatyndaǵy oǵash oqıǵa Qazaqstandaǵy ulttyq-jikshildik pıǵyldyń óte qaýipti taqyryp ekenin taǵy bir ret kórsetti. Bul - "Jańa Qazaqstan" ıdeıasyna qarsy baǵyttalǵan jáne oǵan tikeleı tóngen qaterdiń biregeı belgisi dep baǵalaý kerek", – dedi depýtat.
Aıtýynsha, el ishine jik salý sındromy qoǵamnyń qatty alańdaýshylyǵyn týǵyzyp otyr. Bul memlekettik qaskúnemdikke qyzmet babymen ǵana emes, azamattyq jaýapkershilik pen perzenttik paryz turǵysynda alańdaýshylyq bildirýimiz kerek dep esepteıdi májilismen.
"Iá, el Konstıtýsıasy men tıisti memlekettik zańdar kez kelgen separatızmge qarsy tura alady. Biraq halyqtyq múddeniń qasıettin qorǵaıtyn "ulttyq namys" dep atalatyn taǵy bir qudiretti kúsh bar. Degenmen, bizdiń eldiń namysyn qorǵaǵan ultjandy azamattar Marǵulan Boranbaev pen Danat Namazbaev "ultaralyq arazdyqty týdyrdy" degen jeleýmen árqaısysy 5 jylǵa sottalyp ketti. Anyǵynda, bul azamattar "ultaralyq arazdyqtan" buryn, qazaq halqynyń namysyn "jyrtyp", ulttyq múddeni qorǵap, áleýmettik jelilerdegi separatıstik kózqarastarǵa qarsy shyqqany úshin sotty boldy. Bul jigitterge óreskel qıanat jasaldy", – dedi Bápı.
Depýtattyń pikirinshe, kórshiles elderdiń azamattary aýzyna kelgenin aıtyp jáne jazyp jatqan alaýyz pikirlermen salystyrǵanda, M.Boranbaev pen D.Namazbaevtyń áleýjelidegi áreketi balanyń oıyny bolyp qaldy. Olarǵa jasalǵan qıanat pen ádiletsizdik osy salystyrýdan týyndaıdy.
"Bir el nege óziniń syńarezý saıasatshylaryna tyıym salmaıdy, bizdiń el nege óziniń eldik múddesi men halyqtyq namysyn qorǵaǵan azamattaryn sottaıdy? Olar nege "orys patrıottary" bolyp sanalady, al óz halqynyń namysyn jyrtqan Marǵulan men Danat nege qazaq halqynyń patrıottary bola almaıdy? Kórshi eldiń "uranshylary" qylmystyq sotqa tartylmaq túgili, óz bıligi men tıisti organdary tarapynan ákimshilik turǵyda eskertý de alǵan joq. Al el namysyna arasha túsken eki jigit nege sotty bolady? Endeshe, buǵan deıin Qazaqstanda bolyp kelgen separatızm sındromyn jáne Petropavl qalasyndaǵy jýyqta bolǵan jikshildenýdiń jıirkenishti jaǵdaıatyn eskere otyryp, Marǵulan Boranbaev pen Danat Namazbaevqa qatysty úkimdi qaıtadan qaraıtyn ýaqyt ta, saıası sebep te, ulttyq qaýipsizdik muqtajdyǵy da týdy dep esepteımin", – dedi E.Bapı.
Depýtat Bas prokýrorǵa quziretin paıdalana otyryp, jańadan paıda bolǵan jaǵdaıattarǵa sáıkes, Qazaqstannyń Joǵarǵy sotynan Marǵulan Boranbaev pen Danat Namazbaevqa qatysty sot úkimin qaıta qaraýǵa, olardy túrmeden bosatýǵa pármen berýdi surady.