Jańa sý qoımalary 11 oblysta salynady.
Alapat sý tasqynynan keıin elimizde 20 sý qoımasy salynatyn boldy, dep habarlaıdy Almaty-akshamy.kz
Sý resýrstary jáne ırrıgasıa mınıstrliginiń resmı ókili Móldir Ábdýalıevanyń aıtýynsha, eldimekenderdi sý tasqynynan qorǵaý jáne tasqyn sýyn jınaý maqsatynda Sý resýrstary jáne ırrıgasıa mınıstrligi 20 sý qoımasyn salady.
"Bes sý qoımasynyń qurylysyn bıyl bastaý josparlanyp otyr. Jańa sý qoımalary sýarmaly jerlerdiń aýdanyn 250 myń gektarǵa ulǵaıtýǵa jáne 137 myń turǵyny bar 70 eldimekendi sý basý qaýpin azaıtýǵa septigin tıgizedi. Sondaı-aq, elimizdegi jumys istep turǵan 15 sý qoımasyna rekonstrýksıa jasalady. Bul 70 myń adam turatyn 64 eldimekendi sý basý qaýpin azaıtýǵa, sondaı-aq 74 myń gektar sýarmaly jerge sý berýdi jaqsartýǵa múmkindik beredi", - dedi ol.
Onyń aıtýynsha, sý tasqyny kezeńiniń qorytyndysy boıynsha Sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyna ózgerister engiziledi. Memleket basshysynyń tapsyrmasyna sáıkes, tujyrymdamaǵa sý tasqynynyń aldyn alý jáne erigen qar sýyn jınap, ony odan ári aýyl sharýashylyǵynda jáne basqa da maqsattarǵa paıdalaný jóninde is-sharalar engiziledi.