Vaksına qazan aıyna deıin jetedi.
Budan keıin tegin ekpe úshin sheteldik vaksınalar satyp alynbaıdy, dep habarlaıdy Almaty-akshamy.kz
Qaraǵandy farmasevtıkalyq kombınatynda reseılik «Spýtnık V» vaksınasyn shyǵarý jumysy toqtatyldy. Bul týraly densaýlyq saqtaý vıse-mınıstri – bas memlekettik sanıtar dáriger Aıjan Esmaǵambetova málimdedi.
Bas sanıtardyń aıtýynsha, qazirgi kezde Qazaqstanda 4 mıllıon dozadan astam vaksına bar. Atap aıtqanda, qytaılyq Sinopharm vakınasynyń 1,8 mıllıon dozasy, Pfizer - 1,5 mıllıon, sondaı-aq QazVac-tyń 800 myń ekpesi saqtaýly tur.
«Bunyń bári vaksınalaý men revaksınalaýǵa tolyǵymen jetedi. Sol sebepti qosymsha vaksına satyp alýdyń qajeti joq. Biz ekpelerdi salý sharalaryn únemi baqylap otyramyz. «Spýtnık V»-di satyp alý josparda joq. Qazirgi kezde Qaraǵandy farmasevtıkalyq kombınaty burynǵydaı dári-dármekterdi shyǵaryp jatyr. Vaksınaǵa deıin osy jumyspen aınalysqan. Qazirgi kezde ol jerde vaksına shyǵarylmaıdy», - dedi Esmaǵambetova.
Onyń sózine qaraǵanda, qazirgi vaksınalar qazan aıyna deıin jetedi. Budan keıin sheteldik vaksınalar tegin ekpe úshin satyp alynbaıdy. Ony tek kámelet jasqa tolmaǵan balalar úshin jetkizip otyrady. Al eresek adamdar otandyq QazVac-ty tegin ektire alady. Sheteldik vaksınany aqyly túrde saldyrýǵa múmkindik bolady.
Aıta keteri, 2020 jyly jeltoqsan aıynda Qaraǵandy farmasevtıkalyq kombınaty reseılik «Spýtnık V» vaksınasyn shyǵarýdy bastaǵan. Al bıyl qańtar aıynda revaksınalaý úshin «Spýtnık Laıttyń» 150 myń dozasy jetkizildi.