Bul – ótip bara jatqan jyldaǵy mańyzdy jetistiktiń biri
2023 jyly Qazaqstan Respýblıkasynyń IýNESKO jáne ISESKO isteri jónindegi Ulttyq komısıasynyń jumysy jandana tústi.
Atap aıtqanda, IýNESKO-nyń Almaty qalasyndaǵy Klasterlik keńsesi Qazaqstan, Qyrǵyzstan, Tájikstan, Túrikmenstan, Aýǵanstan, Pákistan jáne Iran memleketterin qamtıtyn Kópsalaly aımaqtyq keńse (Búro) retinde qaıta quryldy. Parıj qalasynda elimizdiń IýNESKO janyndaǵy Turaqty ókildigi ashyldy. Osy bedeldi uıymnyń klýb qozǵalysy aıasynda Qazaqstan alǵash ret IýNESKO-nyń klýbtary men qaýymdastyqtarynyń prezıdenti bolyp saılandy.
Elimiz IýNESKO-nyń Dúnıejúzilik mura komıtetine múshe boldy. Bul – ótip bara jatqan jyldaǵy mańyzdy jetistiktiń biri. Onda Qazaqstan ótinishterdi IýNESKO-nyń tizimine qosý týraly sheshim qabyldaýǵa atsalysady. Sondaı-aq «Turannyń qysqy sýyq shólderi» transulttyq nysanynyń quramdas bóligi retinde «Altyn Emel» ulttyq parki men Barsakelmes qoryǵy aýmaqtary Dúnıejúzilik mura tizimine qosyldy. 2024-2025 jyldarǵa arnalǵan IýNESKO-nyń ataýly kúnderi tizbesine jazýshy B.Soqpaqbaevtyń jáne kompozıtor, kúıshi N.Tilendıevtiń 100 jyldyǵyn engizý týraly usynys qoldaý tapty. «Dıýanı luǵat at-túrk» atty túrki tilderiniń tuńǵysh ensıklopedıalyq sózdiginiń 950 jyldyǵyn atap ótý týraly birlesken usynys ta qabyldandy. Qazaqstannyń bastamasymen 20 mamyrdy Dúnıejúzilik metrologıa kúni dep belgileý týraly qarar maquldandy.
Sonymen qatar Memleket basshysy Qasym-Jomart Toqaevtyń shaqyrýymen 2023 jyly IýNESKO-nyń Bas dırektory Odre Azýle elimizge resmı saparmen keldi. Osy sapar aıasynda Odre Azýle Astanadan bólek, Túrkistandaǵy Qoja Ahmet Iasaýı kesenesine arnaıy baryp, Qazaqstanda tarıhı-mádenı muralardy saqtap qalý úshin atqarylyp jatqan is-sharalar barysymen tanysty.
2024 jyly Ulttyq komısıa bilim, ǵylym, mádenıet, aqparat, jáne komýnıkasıa salalary sıaqty IýNESKO mandatynyń barlyq baǵyttary boıynsha mádenı muralarymyzdy qorǵaý jumysyn jalǵastyrady.