Syrdyń tómengi aǵysyna keletin sý mólsheri artady.
Ol úshin elimiz aldyn ala kelisilgen mindettemelerin oryndady. Endi Qyrǵyzstan "Toqtaǵuldan"sekýndyna 460 tekshe metr sý jiberýi tıis. Qazirgi kórsetkish budan sál kem. Jaǵdaıdy elimizdiń Energetıka mınıstrligi jiti nazarda ustap otyr, dep habarlaıdy Almaty-akshamy.kz 24.kz-ke silteme jasap.
Almasadam Satqalıev Tashkentte qyrǵyzstandyq jáne ózbekstandyq áriptesterimen kezdesip, vegetasıalyq kezeńge qatysty máselelerdi talqylady. Baýyrlas memleketter energetıkalyq resýrs tapshylyǵyna birlesip jol bermeýge ýaǵdalasty. Sondyqtan qoımalardaǵy tirshilik nárin barynsha tıimdi paıdalanyp, aýyl sharýashylyǵyna saqtap qalýdy oılastyryp jatyr. Máselen, Qazaqstan Qyrǵyzstanǵa qyrkúıekten bastap keler jyldyń sáýirine deıin 1 jarym mlrd kılovatt/saǵat elektr qýatyn jóneltpek. "Sol arqyly "Toqtaǵuldan" jaz aılarynda qajetti sý mólsherin alýǵa múmkindik týady", - deıdi mamandar.
«Naryn ózenine keletin sýdyń azaıýyna baılanysty Qyrǵyzstannyń energıa júıesine qosymsha elektr energıasyn jetkizýdi talqylap jatyrmyz. Qyrǵyz tarapy bizden 1,5 mlrd kılovatt-saǵat elektr qýatyn surap otyr. Qazaqstan bul suranysty tolyǵymen ózi ótemek nıette. Jetpegenin Reseı Federasıasynan alatyn bolamyz. Sonyń nátıjesinde biz «Toqtaǵulda» saqtalǵan sý kólemin alamyz», - deıdi "KEGOC" AQ júıelik operatory dıspecherlik ortalyǵynyń dırektory Eraly Shynasylov.