Bul jóninde Úkimet basshysynyń tóraǵalyǵymen ótken keńeste Indýstrıa jáne ınfraqurylymdyq damý vıse-mınıstri Azamat Beıisbekov baıandady.
Azamat Beıisbekov 2029 jylǵa qaraı respýblıkada 147 myńǵa jýyq jumys ornyn qurý arqyly jalpy somasy 33 trıllıon teńgeden asatyn 800-den astam ınvestısıalyq jobany iske qosý josparlanyp otyrǵanyn aıtty, dep habarlaıdy Almaty-akshamy.kz Egemen.kz-ke silteme jasap.
Onyń ishinde 22,1 myńǵa jýyq jumys ornyn qurý arqyly jalpy quny 3,1 trıllıon teńgeni quraıtyn 122 joba qosylǵan quny joǵary taýarlar shyǵarýǵa baǵyttalǵan. Bul – mashına jasaý, qurylys ındýstrıasy, jeńil ónerkásip jáne metalýrgıa salalaryndaǵy jobalar.
Onyń aıtýynsha, búginde elimiz boıynsha ortasha eseppen komýnaldyq jelilerdiń 51%-nyń tozyǵy jetken. Bul baǵytta jergilikti atqarýshy organdar qajettilikterdi eskere otyryp, komýnaldyq ınfraqurylymdy salý men kúrdeli jóndeýdiń óńirlik josparlaryn ázirleıdi. Ártúrli qarjylandyrý kózderi esebinen 2029 jylǵa qaraı komýnaldyq jelilerdiń tozý deńgeıin 40%-ǵa deıin tómendetý josparlanýda.
Sondaı-aq ol búgingi tańda 4 900 aýyl sýmen jabdyqtaý qyzmetterimen qamtylǵanyn atap ótti. 2025 jyldyń sońyna deıin qalǵan 1 395 aýyldyń máselesi sheshiledi. Bul sýmen qamtamasyz etýdiń elimiz boıynsha kórsetkishin 100%-ǵa deıin jetkizýge múmkindik beredi.
Vıse-mınıstr qazirgi ýaqytta respýblıkalyq mańyzy bar qalalarda halyqaralyq tájirıbeni eskere otyryp, ǵımarattardyń syrtqy kelbetiniń biryńǵaı sáýlettik stılin, aýmaqtardy kógaldandyrý men abattandyrýǵa qoıylatyn talaptardy saqtaýdy qamtamasyz etetin keshendi dızaın-jobalardy ázirleý bastalǵanyn aıtty.