Almatyda Qazaqstannyń Eńbek sińirgen ártisi, mádenıet qaıratkeri Baqytjan Ysqaqov turǵan úıge eskertkish-taqta ornatyldy. Saltanatty sharada ánshiniń úzeńgilesteri, dostary men kórermenderi birtýar tulǵany eske aldy.
Baqytjan Ysqaqov 1952 jyly 10 sáýirde Almaty oblysy, Jambyl aýdany, Qaraqastek aýylynda dúnıege kelgen. On jyldyq mektepti bitirgennen keıin, 1969 jyly Respýblıkalyq estrada-sırk stýdıasyna oqýǵa túsken. Ataqty profesor, án áleminiń dúldúli Ermek Serkebaevtyń talantty shákirtiniń biri atanǵan.
Ol 1982–1987 jyldarǵa deıin B.Baıqadamov atyndaǵy qazaqtyń memlekettik hor kapelasynda eńbek etken. Keıinnen onyń týma talantyna tánti bolǵan sol kezdegi teatr dırektory Qýanysh Orazǵalıev 1987 jyly Abaı atyndaǵy Qazaq memlekettik opera jáne balet teatryna shaqyrtqan.
«Teatrǵa kelgenine az ýaqyt bolsa da, Baqytjan barlyq barıton partıalaryn oryndap, juldyzy jarqyrap jandy. Meniń esimde, sonaý 1997 jyly bizder gastróldik saparmen Orynbor qalasyna bardyq. Sol kezde meniń janyma bir kisi kelip, Orsk qalasynda 80% qazaqtardyń turatyndyǵyn, olardyń da ulttyq ónerdi kórýge yntyq ekendikterin jetkizdi. Ne kerek, jolymyzdy, jatyn ornymyzdy kóterip bergen álgi kisiler bizdi Orsk qalasyna ákeldi. Ol jerde bizder «Qyz-Jibek» operasyn sahnaladyq. Sol kezde kórermen qoshemetiniń barlyǵy Bekejandy oınaǵan Baqytjanǵa arnaldy. Qoıylymnan keıin halyqtyń ketkisi joq, barlyǵynyń kóńilderi bosaǵan. Baqytjanǵa rıza bolǵandary sonshalyqty, Orsk qalasynyń atynan «Jıgýlı» mashınasyn syılady. Kórdińizder me? Baqytjannyń talanty talaıdyń tańdaıyn qaqtyratyn edi», – deıdi Qýanysh Orazǵalıev.
Baqytjan Tákenuly barlyq operalyq spektáklderde basty róldi somdady. Olardyń ishinde A.Jubanov pen L.Hamıdıdiń «Abaıynda» Abaı róli jáne E.Brýsılovskııdiń «Qyz Jibek» operasyndaǵy Bekejannyń róli, B.Jumanıazovtyń «Mahambet» operasyndaǵy Mahambettiń róli, Verdıdiń «Travıatasynda» Jermonnyń róli. Verdıdiń «Rıgoletto» operasynda kóptegen rólderde oınady, al «Er Tarǵyn» operasyndaǵy ánshiniń róli «Altyn qorda» saqtaldy.
«Biz Baqytjanmen stýdenttik kezden tanys edik. Bir jaǵynan jerlesim, aǵamdaı bolyp ketken jan. Onyń ánshilik ǵumyryn tek qana shyńǵa órleýmen baılanystyrýǵa bolady. Konservatorıany bitirgennen keıin óner jolyn qarapaıym solıs bolyp bastap, eń bıik shoqtyǵyna jetken kezde ómirden ozyp ketti. Operadaǵy barıton partıalarynyń ishindegi eń joǵarǵy notalardy óz mánerimen, sharyqtatyp aıtatyn. Kompozıtor bolǵandyqtan, bizdiń oıymyz bir jerden shyǵatyn, alaıda onyń kórermenge jetkizý máneri erekshe bolatyn», – deıdi Qazaqstan Kompozıtorlar qaýymdastyǵynyń tóraıymy Balnur Qydyrbek.
Eskertkish-taqta Abaı atyndaǵy Qazaq ulttyq akademıalyq opera jáne balet teatrynyń ujymy men Almaty qalalyq ákimdiginiń muryndyq bolýymen ashyldy.
«Bul kisi barıtondardyń ishindegi tańdaýlysy, daýsy álemdik deńgeıde boldy. Úlken partıalardy 20 jyl boıy sharshamaı, talmaı aıtyp júrgen talantty aǵamyz edi. Bizdegi úlken obrazdardyń barlyǵyn tamsandyra oryndaǵan Baqytjan aǵamyz bolatyn. Ol kisi jastarǵa tálimgerlik etip, baǵyt-baǵdar beretin. «Jaqsyǵa júrim joq» demekshi, nebári 53 jasynda ómirden ótti. Kóńilge medet bolarlyǵy - artynda urpaqtary qaldy», – deıdi Abaı atyndaǵy Qazaq ulttyq akademıalyq opera jáne balet teatrynyń dırektory Nurbaqyt Bókebaev.
Teatr sahnasynda júrip, gastróldyq saparmen shetelderdi aralap, qazaqtyń opera ónerin álemge tanytty. Al 1997 jyly Qazaqstan Respýblıkasynyń eńbek sińirgen ártisi atandy. Baqytjan Ysqaqov ánshilik qyzmetimen qatar, Júsipbek Elebekov atyndaǵy respýblıkalyq estrada-sırk kolejinde ustazdyq etti.
«Baqytjan erekshe jigit edi. Tabıǵı daryn, tabıǵı daýysqa ıe bolatyn. Ol kezderi biz jaspyz, jataqhanada turamyz. Sol shaqtarda gıtaramen án aıtatyn. Keıinnen ol opera teatryna aýysty, úlken obrazdardy oınady. «Ornynda bar ońalar» demekshi, búgin mine, eskertkish-taqtanyń ashylýyna kelip otyrmyz. Bul taqta bolashaq jastarǵa, urpaqtarǵa tálim-tárbıe beretin úlken qural bolady dep senemin», – deıdi Qazaqstan Respýblıkasynyń eńbek sińirgen ártisi Aıdos Bektemir.
İs-shara sońynda Baqytjan Ysqaqovtyń oryndaýyndaǵy ánder jazylǵan kúı-taspalar taratylyp, opera ánshisiniń aty Naýryzbaı aýdanyndaǵy kósheniń birine beriletindigin aıtylyp, kópshilikti qýantty. Sondaı-aq, asyl jary Qarlyǵash apaı men uly İlıas, qyzy Áıgerim kelgen qonaqtarǵa alǵystaryn bildirdi.