Bıyl Elena álemniń birinshi raketkasyn úsh ret utty
Qazaqstannyń birinshi, álemniń 6-raketkasy Elena Rybakına sporttyq jolynda alǵash ret Rım WTA 1000 týrnıriniń jartylaı fınalyna shyqty, dep habarlaıdy Almaty-akshamy.kz QazAqparatqa silteme jasap.
Qazaqstandyq tenısshi shırek fınalda álemniń 1-raketkasy, Polsha ókili Iga Shventekpen oınady. Osyǵan deıin qarsylastar ózara úsh ret kezdesip, sonyń ekeýinde bıyl E. Rybakına jeńgen edi.
Birinshi partıada Iga Shventek 4:0 esebimen alǵa ketip, sol qarqynynan jańylǵan joq – 6:2.
Ekinshi sette de Iga 4:2 esebimen alda turdy. Degenmen, Elena qaıyra breık jasap, tarazy basyn teńestirdi. Sodan keıin taı-breıkte jeńisti julyp aldy – 7:6 (7:3).
Úshinshi, sheshýshi partıada esep 2:2 bolǵan mezette Shventek jaraqatyna baılanysty machty jalǵastyrýdan bas tartty.
Eki saǵat 19 mınýtqa sozylǵan báseke barysynda Rybakına 10 eıs jasap, 1 breık-poıntty múlt jibermedi. Qarsylasy 1 eıs, 3 breıkpen (10 breık-poınt) kózge tústi.
Osylaısha, bıyl Elena álemniń birinshi raketkasyn úsh ret utty.
E. Rybakına fınalǵa shyǵý úshin álemniń 20-raketkasy, latvıalyq Elena Ostapenkomen talasady. Ol shırek fınalda tartysty kezdesýde ıspanıalyq Paýla Badosany joldan taıdyrdy – 6:2, 4:6, 6:3.