Almaty mýzeıinde «Tiri Mýzeı» teatrlandyrylǵan qoıylymy uıymdastyrylady
Halyqaralyq mýzeıler kúnine oraı Almatyda «Mýzeı túni» onlaın aksıasy ótedi, dep habarlaıdy Almaty-akshamy.kz QazAqparatqa silteme jasap.
Halyqaralyq mýzeıler kúnine oraı 18 mamyrda Almaty qalasy mádenıet basqarmasyna qarasty «Almaty qalasy mýzeıler birlestigi» «Tarıh. Tulǵa. Mýzeı» taqyrybynda aýqymdy mádenı-kóńil kóterý sharasyn ótkizýdi josparlar otyr.
«Mýzeı túni» aksıasy – Almatynyń mádenı ómirindegi mańyzdy sharalardyń birine aınaldy. Osyǵan baılanysty «Almaty qalasy mýzeıler birlestigi» KMKQ mýzeıleri taqyryptyq kórmeler, sheberlik sabaqtary, kvest, baıqaýlar, konserttik baǵdarlamalar, teatrlanǵan qoıylymdar kiretin arnaıy mádenı-tanymdyq baǵdarlamalaryn daıyndady.
«Mýzeıler Almaty qalasynyń rýhanı jáne mádenı ómiriniń ajyramas bóligi. Bizdiń murajaılarǵa kelýshiler artefaktilermen tanysyp, olardyń tarıhy men Almaty qalasynyń tarıhy týraly bilip qana qoımaı, túrli rýhanı-tarıhı jáne mádenı is-sharalarǵa qatysyp, oı-óristerin keńeıtedi. Osyndaı aksıalardyń biri «Mýzeı túni» aksıasy», - dedi Óńirlik komýnıkasıalar qyzmeti alańynda ótken baspasóz máslıhatynda «Almaty qalasy mýzeıler birlestigi» dırektorynyń damý jónindegi orynbasary Qaırat Tarbaev.
Spıkerdiń sózinshe, sharanyń saltanatty ashylýy Ortalyq mýzeıde ótedi. Oǵan Z. Altynbaeva, Búrkit jáne Aısha, «Tengri» toby jáne taǵy da basqa estrada juldyzdary óner kórsetedi.
«Máselen, Almaty mýzeıinde «Tiri Mýzeı» teatrlandyrylǵan qoıylymy uıymdastyrylady. Kelýshilerdiń nazaryna qola dáýirindegi áıel, qazaq batyrlary, sondaı-aq basqa da belgili, tarıhı tulǵalar usynylady. Sondaı-aq, belgili ártister Ǵazızhan Shekerbek, Kenjebek Janábilov, Erlan Baınazarov jáne «Tengri ethno music band» qatysatyn konserttik baǵdarlama uıymdastyrylady», - dedi ol.
Almaty mýzeıi baǵdarlamasynda:
- Yqylas atyndaǵy halyq mýzykalyq aspaptar mýzeıinde jáne Mýltımedıalyq dástýrli mýzyka ortalyǵynda QR dástýrli ánshileri Murat Ábýǵazy, Nurjan Janpeıisov, Ramazan Stamǵazıev, «Steppe Sons» modern etno-djaz toby, t.b. qatysýymen konserttik baǵdarlama ótedi. Mýzeıdiń ekspozısıalyq zaldarynda kelýshilerdi Qorkyt, Qurmanǵazy, Aqan seri keıipkerler kútedi.
- D.A. Qonaev mýzeıinde, A. Baıtýrsynuly mýzeı-úıinde, N. Tilendıevtiń memorıaldy mýzeıinde, S. Muqanov pen F. Músirepovtiń ádebı-memorıaldy mýzeı kesheninde konserttik baǵdarlama, derekti fılmder kórsetiledi.