Álemniń 1-shi raketkasynan basym túsken Elena Rybakına alǵash ret Indıan Ýells týrnıriniń fınalyna shyqty.
Qazaqstannyń birinshi, álemniń 10-shy raketkasy Elena Rybakına AQSH-ta ótip jatqan Indıan Ýells WTA 1000 týrnıriniń fınalyna shyqty, dep habarlaıdy Almaty-akshamy.kz
Qazaqstannyń mańdaıaldy tenısshisi jartylaı fınalda álemniń 1-shi raketkasy, Polsha ókili Iga Shventekpen sheberlik baıqasty.
Osyǵan deıin qarsylastar úsh ret kezdesip, sonyń ekeýinde qazaqstandyq tenısshi utqan edi.
Budan eki aı buryn E.Rybakına Aýstralıa ashyq chempıonatynda álemniń 1-shi raketkasyn 6:4, 6:4 esebimen jeńgen.
Bul joly birinshi partıada Elena breıkpen alǵa shyqty. Sodan keıin taǵy bir breıkpen bitirdi – 6:2.
Rybakına ekinshi setti de breıkpen bastady – 2:0. Taǵy bir breık – 4:0. Sodan keıin esep 5:1 bolyp, ózi dop bergende, eki machbolyn paıdalana almady.
Degenmen machty taǵy bir breıkpen támamdady – 6:2.
Bir saǵat 15 mınýtqa sozylǵan báseke barysynda E.Rybakına 7 eıs jasap, 5 breık-poıntty túgel óz esebine jazdy. Qarsylasy 1 eıs, 1 breıkpen kózge tústi.
Osylaısha, álemniń birinshi raketkasyn aıqyn basymdyllyqpen utqan E.Rybakına óz sporttyq jolynda alǵash ret Indıan Ýells jarysynyń (júlde qory – 8,8 mln AQSH dollary) fınalyna ótti.
Ol sońǵy básekede álemniń 2-raketkasy, belorýssıalyq Arına Sobolenkomen bas júldeni sarapqa salady.
A.Sobolenko jartylaı fınalda álemniń 7-shi raketkasy, grekıalyq Marıa Sakkarıdi joldan taıdyrdy – 6:2, 6:3.
Bıyl Aýstralıa ashyq chempıonatynyń fınalynda A.Sobolenko E.Rybakınany 4:6, 6:3, 6:4 esebimen jeńip ketken edi. Sonyń esesin Elena qaıtara ala ma, ony aldaǵy mach kórsetedi.