Bıyl osy kólikterdiń kesirinen 25 adam qaza taýyp, 411 azamat jaraqat alǵan.
Depýtat Nurtóre Júsip mundaı qurylǵylardyń shetten ákelýin shekteý boıynsha sharalar qabyldaýdyń mańyzdy ekenin aıtty, dep habarlaıdy Almaty-akshamy.kz
Depýtattyń aıtýynsha, elektrosamokattar, samokattar men gıroskýterler tek olardyń ıeleriniń ǵana emes, jaıaý júrginshilerdiń de ómiri men densaýlyǵyna eleýli qaýip tóndiredi. Resmı derekter boıynsha, bıylǵy 8 aıynda osyndaı qozǵalys quraldarynyń qatysýymen 387 jaǵdaı tirkelgen, nátıjesinde 25 adam qaza tapqan, al 411 azamat jaraqat alǵan.
«Elektrosamokattardy ákelýdi jáne qaýipsiz paıdalanýdy quqyqtyq retteý qajet dep bilemiz. Sizden joǵaryda atalǵan qurylǵylardy jikteý jáne zańnamalyq aktilerge tıisti túzetýler engizý máselesin tezdetip pysyqtaýdy suraımyn. Eýrazıalyq ekonomıkalyq odaqtyń salalyq tehnıkalyq reglamentteriniń normalaryn eskere otyryp, kedendik baqylaýdy júzege asyrý aıasynda reglamentter men standarttardyń talaptaryna sáıkes kelmeıtin qurylǵylardyń shetten ákelýin shekteý boıynsha sharalar qabyldaý mańyzdy», - dedi Nurtóre Júsip QR Premer-Mınıstriniń orynbasary Roman Sklárǵa joldaǵan depýttatyq saýalynda.