Sońǵy ýaqytta veıpqumar adamdardyń qatary artyp barady. Osy qurylǵylardyń densaýlyqqa keri áserinen bólek qorshaǵan ortaǵa da zalaly orasan.
Álemde veıpke arnalǵan 844 mıllıon qurylǵy jyl saıyn dalaǵa tastalady. Osynyń bárin qossa, 6 "Eıfel munarasyna" teń qoqys shyǵady. Densaýlyqqa kesirin kerek qylmaı júrgen jastar elektron shylymnyń qorshaǵan ortaǵa zıanyn tipten oılamaıdy. Bir rettik qoldanýǵa arnalǵan qurylǵy 1 myń jylǵa deıin shirimeı, aınalany lastap jata beredi.
Bir ǵana Brıtanáda apta saıyn bir rettik qoldanýǵa arnalǵan 5 mıllıon elektron temeki qoqysqa aınalady. Ondaǵy lıtııdiń mólsheri elektrmobıl jasaýǵa qajetti 5 myń akýmýlátor jasaýǵa jetkilikti. Qoldanýshylardyń kóbi ony qaıta óńdeýge tapsyrý úshin ne isteý kerektigin bilmeıdi. Jaqynda júrgizilgen saýalnamaǵa qatysqandardyń 73 paıyzy veıpti qoqys jáshigine tastaı salatyn kórinedi. Al ondaǵy lıtıı batareıalarynan órt shyǵýy múmkin. Mysaly, AQSH-ta sońǵy 7 jylda osyndaı 250 oqıǵa tirkelgen.