Qazaqstanda ekologıalyq taza kólikterge jańa zań qabyldandy
Búgin Qazaqstan Respýblıkasy Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ekologıalyq taza kólikti tanymal etý jáne elektromobılderge arnalǵan ınfraqurylymdy damytý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, resmı túrde qabyldandy, dep habarlaıdy almaty-akshamy.kz
Bul zań jobasyn Parlament Májilisiniń depýtattary bastamashy bolyp, 2024 jylǵy 17 qańtarda birinshi oqylymda maquldady. Zańnyń negizgi maqsaty – elimizde elektrmobılder ınfraqurylymyn damytý jáne ekologıalyq taza kólikterdi tanymal etý bolyp tabylady.
Májilistiń Ekologıa máseleleri jáne tabıǵat paıdalaný komıtetiniń málimetinshe, qujat aıasynda birneshe zańdarǵa ózgerister men tolyqtyrýlar engiziledi. Olardyń ishinde QR Jer kodeksi, «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly», «Avtomobıl joldary týraly», «Avtomobıl kóligi týraly», «Elektr energetıkasy týraly», «Erekshe qorǵalatyn tabıǵı aýmaqtar týraly» jáne «Jol júrisi týraly» zańdary bar.
- «Elektromobıl» jáne «elektrqýattaý stansıasy» degen jańa uǵymdar engiziledi.
- Joldardy jobalaǵan kezde elektrqýattaý stansıalaryn ornalastyrý úshin bólek oryndar bólinedi.
- Elektrqýattaý stansıalary jol boıyndaǵy servıs obektilerine jatqyzylady jáne olar úshin jekelegen oryndar belgilenedi.
- Aýmaqty egjeı-tegjeıli josparlaý jobasynda elektrqýattaý stansıalaryn ornalastyrý úshin rezervke oryndar qoıylady, turǵyn jáne qoǵamdyq aımaqtardy qosa alǵanda.
- Áýejaılarda, vokzaldarda, saýda obektilerinde, teatrlarda, kınoteatrlarda jáne basqa da oryndarda elektrqýattaý stansıalary bar taksılerdiń turaǵyn uıymdastyrý jáne jabdyqtaý jónindegi fýnksıalar belgilenedi.
- Erekshe qorǵalatyn aýmaqtardy josparlaý jobasynda elektrqýattaý stansıalary bar turaqtar úshin oryndardy ornalastyrý.
- Elektromobılderdiń turaǵy úshin arnaıy bólingen oryndardy bólý.
- Elektromobılderdiń ıelerin turaqta aqy tóleýden bosatý.
Zańdy ekinshi oqylymda talqylaý kezinde depýtattar qosymsha túzetýler engizdi. Bul elektrqýattaý stansıalaryn ornalastyrý úshin ortaq paıdalanýdaǵy jerlerden ýaqytsha jer paıdalanýǵa jer ýchaskelerin berý jáne ákimdikterge elektrqýattaý stansıalaryn ornalastyrý sheshimderin qabyldaý quzyretin berý máselelerin qamtıdy. Sonymen qatar, elektr energıasyn qosý, paıdalaný jáne tutyný kezinde elektrqýattaý stansıalarynyń qaýipsiz jumys isteýi boıynsha talaptar belgilendi.
Depýtattar «Avtomobıl kóligi týraly» jáne «Jol júrisi týraly» zańdaryna da tıisti túzetýler engizdi. Olardyń ishinde avtobýstar men troleıbýstar júrgizýshileriniń jasyn jıyrma úsh jasqa deıin tómendetý jáne keminde úsh jyl jumys ótilin belgileý usynyldy. «D1» kishi sanatyndaǵy júrgizýshiler úshin jumys ótili keminde bir jyl bolýy tıis.
Bul zańnyń qabyldanýy Qazaqstandaǵy ekologıalyq taza kólikterdiń damýyna úlken serpin beredi jáne eldiń ekologıalyq jaǵdaıyn jaqsartýǵa baǵyttalǵan mańyzdy qadam bolyp tabylady.
Esterińizge sala ketsek buǵan deıin "Kólik mınıstrligi men Car Park Transformer Limited yntymaqtastyq týraly kelisimge qol qoıǵany týraly" jazǵan bolatynbyz.