Qazaqstanda jańartylatyn energıa kózderi qarqyndy damyp keledi, alaıda olardyń tıimdiligi jeldiń kúshi, aýa raıy jaǵdaılary jáne kún sáýlesiniń qoljetimdiligi sıaqty faktorlarǵa baılanysty ózgerip otyrady. Elektr jelisiniń turaqtylyǵyn qamtamasyz etý úshin kómir jáne atom stansıalary sıaqty senimdi, turaqty bazalyq kózder qajet.
Atom elektr stansıalary (AES) salý – elektr energıasynyń tapshylyǵyn qysqartýǵa, tarıfterdiń ósýin tejeýge jáne ekologıany jaqsartýǵa múmkindik beretin senimdi sheshimderdiń biri. Kómir stansıalary ekologıaǵa jáne adam densaýlyǵyna keri áserin tıgizetindikten, atom energetıkasy ekologıalyq turǵydan áldeqaıda tıimdi bolyp tabylady.
AES elektr energıasynyń quny men óndiris turaqtylyǵy boıynsha ońtaıly tańdaý retinde qarastyrylady. Sonymen qatar, AES eldiń energetıkalyq táýelsizdigin nyǵaıtady, sebebi ol otyn ımportyna táýeldilikti azaıtady. Bul elektr energıasynyń baǵasyn baqylaýda ustaýǵa kómektesedi jáne syrtqy faktorlarǵa táýeldilikti tómendetedi.
Uzaq merzimdi perspektıvada AES paıdalaný shyǵyndary jańartylatyn energıa kózderine qaraǵanda tómen bolýy múmkin. Sebebi atom stansıalary uzaq ýaqyt boıy turaqty mólsherde elektr energıasyn óndiredi, al olardyń jumys isteý merzimi birneshe onjyldyqqa sozylady. Osylaısha, AES salý jáne paıdalaný elektr energıasynyń tarıfterin turaqtandyrýǵa eleýli yqpal ete alady, bul óz kezeginde tutynýshylar úshin uzaq merzimdi turaqty baǵany qamtamasyz etedi.
Qoryta aıtqanda, AES Qazaqstan úshin elektr energıasynyń qoljetimdiligin arttyryp qana qoımaı, ekologıany jaqsartýǵa jáne eldiń energetıkalyq táýelsizdigin nyǵaıtýǵa múmkindik beredi.