Komýnaldyq tarıfterdiń ósýine baılanysty áleýmettik osal azamattarǵa qosymsha qoldaý kórsetý úshin ótemaqy mólsheri 2023 jylǵy 1 qarashadan bastap – 0,5 AEK-ten (1725 teńge) 0,6 AEK-ke (2070 teńge) deıin artatyn bolady.
Mundaı sheshim Almaty qalasy máslıhatynyń kezekten tys XI sesıasynda qabyldandy, dep habarlaıdy Almaty-akshamy.kz.
Osy jyldyń 1 qarashasynan bastap elektr energıasynyń tarıfi kóterilgen soń túzetý qajet boldy: zańdy tulǵalar úshin – 1,2% – ǵa, jeke tulǵalar úshin-1 kvt / saǵ úshin 7% - ǵa.
Buǵan deıin HÁOT sanatyndaǵy almatylyqtar úshin 0,5 AEK ótemaqyny máslıhat aǵymdaǵy jyldyń tamyz aıynda bekitti, óıtkeni shilde aıynda komýnaldyq qyzmetterge tarıfter kóterildi.
Tarıfterdiń ósýin óteý úshin áleýmettik kómek azamattardyń ótinishi boıynsha tólenedi. Almaty ákiminiń orynbasary Asqar Ámrın DREM esepteýleri boıynsha tarıftiń ósýi jeke tulǵalar úshin kórsetiletin qyzmetterdiń qunyn orta eseppen 315,6 teńgege arttyratynyn túsindirdi. Ótemaqy mólsherin qaıta qaraý turǵyn úıge áleýmettik kómekti 345 teńgege arttyrýǵa múmkindik beredi. Depýtattar ákimdiktiń usynysyn qoldady. Áleýmettik kómek kórsetý merzimi 2024 jylǵy 30 maýsymǵa deıin uzartylady. Bul rette, eger kórsetiletin qyzmetti alýshy 2023 jylǵy 31 jeltoqsandaǵy jaǵdaı boıynsha áleýmettik kómek alýshy bolyp tabylǵan jaǵdaıda, oǵan ótinishsiz áleýmettik kómek taǵaıyndalady, al 2023 jylǵy 31 jeltoqsannan keıin júgingen adamdarǵa áleýmettik kómek ótinish berilgen aıdan bastap taǵaıyndalady jáne tólenedi.
Aıta keterligi, tarıfterdi kóterý qalanyń komýnaldyq jelileriniń tozýyn azaıtý jáne apattar men komýnaldyq qyzmetterdi kórsetýdegi úzilister táýekelderin azaıtý úshin "Investısıalarǵa aıyrbastaý tarıfi" baǵdarlamasyn iske asyrý aıasynda júrgizilýde.