El birligin nyǵaıtý úshin qyzmet etý – eń jaýapty ári saýapty is. Bul týraly búgin elordada Qazaqstan halqy Assambleıasynyń sesıasynda Memleket basshysy Qasym-Jomart Toqaev aıtty, dep habarlaıdy almaty-akshamy.kz
«Halqymyzdyń yntymaq-birligi bul – taǵdyrdyń bere salǵan syıy emes. Bul – eń aldymen, jurtymyzdyń kúndelikti tabandy eńbeginiń arqasy ekenin durys túsinýimiz kerek. Sondyqtan biz birligimizdi kún saıyn nyǵaıtyp otyrýymyz qajet», - dedi Qasym-Jomart Toqaev.
Osy oraıda Prezıdent tatýlyq pen kelisim halqymyzdyń ómir saltyna aınalýy tıis ekenin aıtty.
«Áıtpese, eldikti saqtap qalýymyz óte qıyn bolady. Jaqsy tilek aıtý – halqymyzdyń qanyna sińgen qasıet. «Jaqsy sóz – jarym yrys» dep beker aıtylmaǵan. Men barsha otandasymyzdy elimizdiń bereke-birligin baǵalaı bilýge shaqyramyn. Shyn máninde, el birligin nyǵaıtý úshin qyzmet etý – eń jaýapty ári saýapty is. Eldikti buzý, birlikti shaıqaltý, bul – zań aldynda qylmys, Qudaı aldynda – kúná. Osyny bárimiz tereń túsinýimiz qajet», - dedi Memleket basshysy.