Ashraf Ǵanı «Talıban» qozǵalysynyń Aýǵanstandy basyp alǵany úshin keshirim surady.
Aýǵanstannyń burynǵy prezıdenti Ashraf Ǵanı 15 tamyzda Kabýldy tastap, «Talıban» qozǵalysynyń eldi jaýlap alýǵa jol bergeni úshin halyqtan keshirim surady, dep habarlaıdy Almaty-akshamy.kz Aikyn.kz-ke silteme jasap.
«Osynyń bárin basqasha aıaqtaı almaǵanym úshin aýǵan halqynan keshirim suraımyn. Aýǵan halqyna qyzmetim sheksiz, bar ómirimdi soǵan arnaımyn», - dedi elden qashqan prezıdent Tolo News telearnasyna bergen suqbatynda.
Eks-prezıdent belgisiz bir shetel azamattary ómirine qastandyq jasaǵanyn bólisti. Ǵanıdiń aıtýynsha, olar prezıdent saraıyna kirip, bólmelerden prezıdentti izdegen.
«Men elden ketýge májbúr boldym, aıaq kıim aýystyrýǵa mursha bolmady. Ómirimdegi basty baılyǵym: kitaptarymdy, jazbalarymdy, jeke noýtbýgymdy alyp kete almadym. Halyqaralyq kúshtermen elden shyǵý joldaryn talqylaýǵa ýaqyt bolmady. Elden bir ǵana kostúmmen shyqtym. Basqa jaıttaryn, Qudaı qalasa, kelesi joly aıtyp berermin», - dedi Ashraf Ǵanı.
Qazir ol Birikken Arab Ámirlikterinde turyp jatyr. Aýǵanstannyń burynǵy basshysy aýǵan halqyna tıesili mıllıondaǵan dollardy ózimen birge alyp ketti degen málimetti taǵy da joqqa shyǵardy.
«Bunyń bári jalǵan. Jemqorlyq – dert, prezıdent bolǵan ýaqytta bar kúshimdi sonymen kúresýge arnadym», – deıdi burynǵy prezıdent.
AQSH prezıdenti Djo Baıden Aýǵanstan bıligi, bergen ýádesine qaramastan, kelisim men soǵysqa daıyn emes bolyp shyqty dep málimdegen.
«Ǵanı myrza aýǵan áskeri soǵysady dep sendirgen, biraq, soǵan qaraǵanda, ol qatelesken sekildi», - dep málimdedi Baıden 16 tamyzda ultqa arnaǵan telejoldaýynda.