Týrısik kompanıalar pandemıadan keıin óz jumysyn jyldam retke keltire aldy.
Ótken jyldyń úsh toqsanynyń qorytyndysyna sáıkes, otandyq týrısik operatorlar men agenttikterdiń tabysy 185,11 mlrd teńgeni qurady. Bul pandemıa shekteýleri kúshine enbegen 2019 jyldyń sáıkes kezeńimen salystyrǵanda shamamen 5 ese artyq, dep jazady Almaty-akshamy.kz DataHub Telegram arnasyna silteme jasap.
"Demalys ýaqytyna tuspa-tus keletin úshinshi toqsan týrızm úshin dástúrli túrde qolaıly maýsym bolyp esepteledi. Biraq ta, bıylǵy maýsymdaǵydaı 109,82 mlrd teńge tabys budan buryn tirkelmegen. Mysal retinde aıtar bolsaq, 2021 jyly shilde-qyrkúıek aralyǵynda bul kórsetkish 17,99 mlrd teńge, 2020 jyly 7,04 mlrd teńge, 2019 jyly 16 mlrd teńge, 2018 jyly 11,32 mlrd teńge bolǵan. Budan bólek, 2022 jyldyń ekinshi toqsanyndaǵy kórsetkish te oǵan belgili bir deńgeıde yqpal etti (55,49 mlrd teńge)", - delingen habarlamada.
Týrısik kompanıalar pandemıadan keıin óz jumysyn jyldam retke keltire aldy. 2021 jyly burynǵy tabystaryna qol jetkizdi.
Sarapshylardyń sózinshe, byltyrǵy týrısik kompanıalar tabysynyń artý sebebin naqty túsindirý qıyn.
"Týrısik kompanıalar men operatorlar tabysynyń artýyna birqatar faktorlar áser etýi múmkin. Oǵan PTR-testiler men kovıd pasporttarynyń kúshin joıý, týrısik paketter qunyn 30%-ǵa ulǵaıtý jatady. Desek te, qazaqstandyqtardyń satyp alý qabileti, sondaı-aq týrısik aǵyndardyń áli de bolsa qalpyna kelmegenin eskeretin bolsaq, osynshalyq ósim bolmaýy kerek edi", - dedi sarapshylar.