El aýmaǵyndaǵy kúl úıindileriniń kólemi 1,41 mlrd tekshe metrge jetken.
Energetıka mınıstri Erlan Aqkenjenov Úkimet otyrysynda osyndaı derek keltirdi, dep habarlaıdy aqshamnews.kz.
— Búgingi tańda elimizde 227 elektr stansıasy jumys isteıdi. Bul rette onyń ishinde kómirdi negizgi otyn retinde paıdalanatyn iri energıa óndirýshi uıymdardyń sany — 21. Osy energıa óndirýshi uıymdar aýdany 18,2 myń gektar 27 kúl úıindisin paıdalanady. Kúl úıindileriniń jalpy kólemi — 8,23 mlrd tekshe metr, onyń 1,41 mlrd tekshe metri toltyryldy. 2024 jyly kúldi óńdeýmen aınalysatyn kompanıalar 69,2 myń tonna kúldi óńdedi, — dedi ol.
Sondaı-aq, mınıstr kúldi óńdeý ásirese sement pen beton óndirý salasyna tán ekenin aıtty.
— Qazaqstanda kúldiń quramy ónerkásip talaptaryna sáıkes kelmeıdi. Qazaqstandyq jylý energıa ortalyqtary men memlekettik aýdandyq elektr stansıalary negizinen quramynda janbaıtyn qospalary joǵary qońyr jáne tas kómirdi paıdalanady. Sondaı-aq, kúl-qoj qaldyqtarynda kúkirt qosylystary men synap, qorǵasyn, myshák sıaqty aýyr metaldar bar, bul qurylystaǵy kúldiń qunyn tómendetedi. Osyǵan baılanysty qosymsha tazalaý jáne qaıta óńdeý qajet, bul sońǵy ónimniń ózindik qunyn arttyrady, — dedi Erlan Aqkenjenov.