Qazaqstanda 4 mıllıonnan astam kólik bar
Sonyń jartysy ábden tozǵan, dep habarlaıdy Almaty-akshamy.kz.
24.kz habarlaýynsha, eski avtomobılderdiń basym bóligi ońtústik óńirlerde kezdesedi. Mamandar sonyń áserinen ekologıa búlinip, aýa lastanyp jatqanyn aıtýda. Óıtkeni eldegi zıandy tútinniń 90 paıyzy kólikterden bólinedi.
Qaısar Jamıhanov esimdi azamat 31 jyl buryn shyǵarylǵan eski "Taıota" avtokóligin minip júr. «Júrgeninen turǵany kóp kóliktiń mashaqaty ábden qajytty»,- deıdi ol. Sebebi, eski kóliktiń kaýipsizdigi tómen, buzylýǵa beıim ári qyzmet kórsetý quny qymbat. Al jańasyn alýǵa qarajaty qat.
«Taıota Karıne E, 1992 jylǵy mashına. 31 jyl bolǵan. Júrmiz osymen, jańa mashına alýǵa múmkindik joq. Osylaı qınalyp júrmiz, onyńda bóleksheti qymbat», - deıdi Qaısar Jamıhanov.
Tipti shyqqanyna 10 jyl bolǵan kólikter bizdiń naryq úshin jańa kólikterdiń qatyrynda bolǵanymen, keı shet elderde olardy eski dep sanaıdy. Bizde bul sekildi aty jańa bolǵanymen zaty eski kólikter kóp. 4 mlnnnan asatyn avtomobıldiń tek 600 myńy ǵana jańa. Shyqqanyna 7-10 jyl bolǵan kólikterdiń sany - 581 myń. 10-20 jyl aralyǵynda qoldanystaǵy kólikter - 913 myń. Al 20 jyldan eski kólikter 2 mıllıonǵa jýyqtady.
Elde 4 mlnnan asa kólik bolsa, olardyń 20 jyldan asqandary — 1 mln 999 myń
10-20 jyl — 913 myń
7-10 jyl — 581 myń
3-7 jyl — 259 myń
1-3 jyl — 382 myń
Ásirese, Jambyl, Almaty, Túrkistan oblystaryna tozyǵy jetken avtomobıl kóp. Ózge óńirlerdegi kórsetkish te máz emes. Muny dárigerler shyr-pyr bolyp, kópten beri aıtyp júr. «Ekologıalyq talaptardan ada avtokólikterdi azaıtpasaq, tynys alý jolyndaǵy qaterli isik kóbeıedi»,- deıdi olar. Ekologtar da bul pikirmen kelisedi.
«Olardan bólinetin azod oksıdi, úlken jyldamdyqpen júretin bolsa qatty bólshekter túzilýi múmkin. Ásirese dızelmen júretin mashınalarda. Sondyqtan bul tusta birinshi kezekte tehosmotrdan durys ótkizý kerek. Ótirik tehasmotr ótkizý, aqshamen ótkizý degendi aýyzdyqtaý kerek. Katalızatorlyq bloktyń bolýyn qamtamasyz etý kerek», - tájirıbeshil ekologtar qaýymdastyǵynyń tóraıymy Laýra Málikova.
Jańa kóliktiń ekologıaǵa zıany az ekeni belgili. Alaıda ekiniń biri jańa tulpardy tizgindeýge múmkindigi joq. Otandyq avtoındýstrıa salasy suranysty tolyq qamtamasyz etip otyr deý de qıyn. Avtoóndirýshiler, «Ekologıaǵa tıimdi, qozǵaltqysh kólemi kishi kólikterdi qurastyrýdamyz»,- deıdi. Bıyl sý jańa avtomobılge suranys 31,1 paıyzǵa artqan. Alǵashqy alty aıda 66 myń kólik satylǵan.