Qazaqstanda ónerkásiptik granttar beriledi
Atalmysh grant otandyq kásiporyndardy yntalandyrýdyń ózindik jańa quralyna aınalady, dep habarlaıdy Almaty-akshamy.kz Qazaqtv.com caıtyna silteme jasap
Bul týraly Senat otyrysynda QR Indýstrıa jáne ınfraqurylymdyq damý mınıstri Beıbit Atamqulov habarlady. Onyń aıtýynsha, aqsha óndiristi tehnologıalyq jaǵynan jańǵyrtýǵa bólinedi. Iaǵnı endi kásipkerlerge óz jabdyqtaryn jańartýǵa memleket kómektesedi.
Bul shara shıkizat, joǵary tehnologıalyq taýarlar jáne asa suranysqa ıe ónimder shyǵaratyn óndirýshilerge qatysty. Jaýapty sala basshysynyń aqparaty boıynsha, qaıta óńdeýdi jaqsartýǵa basa nazar aýdarylady.
Mınıstr respýblıkadaǵy kóptegen zaýyt Keńes Odaǵy kezinen beri jańartylmaǵanyn, sondyqtan da eńbek ónimdiligi tómen ekenin aıtty. Alaıda kásiporyndardyń oryndaýy tıis óz mindetteri bolady.
«Olar ózderi málimdegen ónimniń óndiris kólemi, sapasy, eń bastysy eksportqa baǵdarlanýy boıynsha jaqsy kórsetkishterge qol jetkizýi tıis. Iaǵnı biz qoldaý kórsetken zaýyttar eń joǵary, halyqaralyq standarttarǵa sáıkes keletin jáne básekege qabiletti ónim shyǵarýy kerek. Eger olar sharttardy oryndamasa, memleket tarapynan jumsalǵan qarajatty búdjetke qaıtarýǵa májbúr bolady», - dedi QR Indýstrıa jáne ınfraqurylymdyq damý mınıstri Beıbit Atamqulov.