Elimizde «baı adam» sanatyn anyqtaıtyn tabys somasy belgilenýi múmkin.
Ulttyq ekonomıka vıse-mınıstri Azamat Ámrın Senatta ótken dóńgelek ústelden keıin BAQ ókilderine osyndaı málimet berdi, dep habarlaıdy Almaty-akshamy.kz QazAqparatqa silteme jasap.
Vıse-mınıstr «Baı adam» degendi kim dep túsinesiz?», - degen suraqqa qazir jaýap berý erte ekenin aıtady.
«Sizge naqty sıfr kerek shyǵar. Ondaı sıfrdy ataý ázirge erte. Nege ekenin túsindireıin. Bul jalpyǵa birdeı deklarasıa aıasynda júretindikten, alynǵan málimetterdi jınaý kerek bolady. Kimniń qandaı tabysy bar ekenin taldap, jikteý qajet. Bul shamamen 2027 jyly múmkin bolady. Qazir 2023 jyl. 5 jyldan keıin «baı adam» dep kimdi aıtýǵa bolatynyn zerttep, esepteýge bolatyn shyǵar. Naqty bir sıfrdy anyqtaıtyn shyǵarmyz», - dedi ol.
Sondaı-aq, atalmysh sanattaǵy adamdarǵa salyq qalaı salynatynyn aıtty.
«Tabys salyǵynyń progresıvti shkalasy qandaı shekti somadan bastap alynatynyn esepteımiz. 10 paıyz degen bazalyq mólsherleme bolatyny túsinikti. Odan joǵary 15-20 paıyz bolý kerek degen nusqalar bar. 10-20-30 paıyzdyq shkala qoıý múmkindigin talqylap jatyrmyz. Biraq onyń bári qansha somadan alynady? Mıllıon teńge me, 1,5-2 mln teńge me? Ol somany zańdaǵy ózgeristerdiń mátinin jazǵan kezde ataıtyn shyǵarmyz. Óıtkeni qazir aldaǵy 5 jylǵa boljam aıtý birshama qıyn. Jalpy bul suraqpen qaıtkende de betpe-bet keletinimiz túsinikti. Salyq kdoeksiniń mátini daıyn bolǵan kezde ol sıfrdy aıtamyz», - dedi Azamat Ámrın.
Ulttyq ekonomıka jáne Qarjy mınıstrlikteri Salyq kodeksiniń jańa redaksıasyn Parlament qaraýyna keler jyldyń kóktemine deıin usynýdy josparlap otyr.