«Adal azamat» birtutas tárbıe baǵdarlamasyn júzege asyrý aıasynda 2023 jyldan bastap barlyq memlekettik bilim berý uıymdarynda ata-analarǵa pedagogıkalyq qoldaý kórsetý ortalyqtary jumys isteı bastady jáne ol otbasy men mekteptiń ózara yntymaqtastyǵyn nyǵaıtý, sondaı-aq pozıtıvti ata-ana mádenıetin qalyptastyrý alańyna aınaldy.
Bul ortalyqtardyń negizgi maqsaty ata-analardy balalardy tárbıeleý men oqytý úderisine tartý ǵana emes, olarǵa qajetti pedagogıkalyq jáne psıhologıalyq qoldaý kórsetý bolyp tabylady, dep habarlaıdy aqshamnews.kz.
Jyl basynan beri bul ortalyqtarǵa 1,4 mıllıonnan astam ata-ana tirkelip, olar 108 myńnan astam dáriske belsene qatysqan. Dáris taqyryptary mektep jasyna deıingi balalardy tárbıeleýden bastap jasóspirimder arasyndaǵy daý-janjaldardy sheshýge deıingi kóptegen ózekti máselelerdi qamtydy.
PIRLS jáne TIMSS sıaqty halyqaralyq zertteýlerinen-aq ata-analardyń bilim berý úderisine qatysýynyń mańyzdylyǵyn naqty kórýge bolady. Mysaly, ata-analary balalarymen júıeli túrde aınalysatyn oqýshylardyń baly ata-analary balaǵa sırek kóńil bóletin oqýshylarǵa qaraǵanda 16-37 balǵa, onyń oqýyna qatyspaǵandarǵa qaraǵanda 110 balǵa joǵary boldy
«Birtutas bilim berý baǵdarlamasyn engizý ata-analardyń qatysymyn 42%-dan 82%-ǵa deıin aıtarlyqtaı arttyrdy. Pedagogter arasynda júrgizilgen saýalnama nátıjesine súıensek, olardyń 82 paıyzy baǵdarlamanyń synyp jetekshileriniń kásibı damýyna oń áserin, 84 paıyzy oqýshy belsendiliginiń artqanyn, 71 paıyzy mektep pen otbasynyń ózara árekettesýiniń jaqsarǵanyn atap kórsetken. Bul rette ata-analardyń 89 paıyzy baǵdarlamanyń balalardyń minez-qulqyna oń áser etkenin rastady», – deıdi Y.Altynsarın atyndaǵy UBA vıse-prezıdenti Anar Táńirbergenova.
Búginde oqý-aǵartý mınıstrligi baǵdarlamany jetildirýde. Osy maqsatta ata-analarǵa pedagogıkalyq qoldaý kórsetý ortalyqtary jumysynyń sapasyn arttyrýǵa baǵyttalǵan ádistemelik usynystar ázirlenip jatyr. Bul usynystar muǵalimderge, ata-analarǵa jáne oqýshylarǵa oqý-tárbıe prosesiniń maqsattary týraly ortaq túsinik qalyptastyrýǵa, tájirıbe almasýǵa jáne balalardyń jan-jaqty damýyna qolaıly jaǵdaı jasaýǵa septigin tıgizedi.