Almatynyń qos perzenthanasy men emhanasy jańa týǵan bóbekterdiń qulaǵyn tekseretin zamanaýı apparatqa ıe boldy
Almatydaǵy №5 qalalyq perzenthana, qalalyq perıtanaldyq ortalyq, №10 jáne №36 qalalyq emhanalar sábılerdiń estý qabiletin tereńdetip tekserýge arnalǵan jańa jabdyqtarǵa ıe boldy. Ol úshin AYALA qaıyrymdylyq qory men «Men estımin» pılottyq jobasy sheńberinde Halyk Bank qoldaý kórsetti.
Zamanaýı quraldar jańa týǵan nárestelerdiń estý qabiletiniń jasyryn buzylýyn anyqtaýǵa jáne múgedektikti tómendetýge múmkindik beredi. Eki jylda Almatyda 62 myńǵa jýyq sábı tekserýden ótedi degen jospar bar.
«Biz bul jobany qýana qoldadyq. Óıtkeni biz úshin ómirge endi kelgen bóbekterdiń deni saý azamat bolyp ósýi mańyzdy. Halyk Bank AYALA qorymen yntymaqtasa otyryp, balalardyń densaýlyq saqtaý salasyndaǵy jobalaryn kópten beri belsendi qoldap keledi. Qazirgi zamanǵy dıagnostıkalyq jabdyq Qazaqstannyń kóptegen medısınalyq mekemelerinde tur jáne kún saıyn nárestelerdiń densaýlyǵyn saqtaýda mańyzdy ról atqaryp keledi. Jańa joba aıasynda almatylyq dárigerler balalardyń estý qabiletin der kezinde anyqtap, emdeı alatynyna senimdimiz», – dep atap ótti Halyk Bank PR-qyzmeti basqarmasynyń bastyǵy Gúlmıra Arbabaeva.
«Men estımin» pılottyq jobasy Almaty qalasy Qoǵamdyq densaýlyq saqtaý basqarmasynyń AYALA qaıyrymdylyq qorymen, «Meıirimdilik» erikti qoǵamy» qorymen jáne «SATR» ortalyǵymen memorandýmy aıasynda iske asyrylýda. Qalanyń bes medısınalyq mekemesinde týa bitken problemalardy der kezinde anyqtaý úshin sábıler men úsh jasqa deıingi balalardyń estý qabiletin tereńdetip skrınıngteý uıymdastyryldy. Jańa jabdyq balanyń estýin týǵannan keıin birden tekserýge jáne aldyńǵy býyn aspaptary jasaı almaǵan mı dińindegi buzylystardy anyqtaýǵa múmkindik beredi.
Sýrdologtardyń málimetinshe, elimizde jyl saıyn 1400-ge jýyq sábı estý qabileti tómen nemese sańyraý bolyp dúnıege keledi. Qazir perzenthanalarda estýdi tekserý kezinde alynǵan derekter qolmen tirkeledi, bul estý boıynsha patologıasy anyqtalǵan balalardyń odan arǵy taǵdyryn qadaǵalaý prosesine áser etedi.
Bul máseleni sheshý úshin jańa dıagnostıkalyq apparattar sıfrlyq trekkıng ortalyǵyna qosylǵan. Perzenthanalar men emhanalardyń medbıkeleri osy jabdyqpen jumys isteý boıynsha arnaıy oqytýdan ótti. Endi test nátıjeleri avtomatty túrde biryńǵaı bazaǵa jiberiledi. Onda dárigerler dınamıkany baqylap, bala týǵannan keıingi úshinshi aıda emes, perzenthanadaǵy alǵashqy aýdıologıalyq skrınıngten keıingi on tórtinshi kúni tekserý sapasyn baqylaı alady. Mundaı tásil derekterdiń joǵalýyn boldyrmaıdy, qatelikter yqtımaldyǵyn tómendetedi jáne dıagnostıkanyń dáldigin arttyrady.
«Osy jobanyń arqasynda táýekel tobyndaǵy balalar qymbat ýaqytty joǵaltpaı, ýaqytyly kómek alady. Estý qabileti buzylǵan balalar qala búdjeti esebinen tegin estý apparattaryn ala alady. Bul memleket pen qoǵamnyń myńdaǵan balaǵa paıda ákeletin yntymaqtastyǵynyń tamasha úlgisi», – dep atap ótti Almaty qalalyq Qoǵamdyq densaýlyq saqtaý basqarmasy basshysynyń orynbasary Nazgúl Imanǵalıeva.
AYALA qaıyrymdylyq qory úshin bul joba – Qazaqstandaǵy balalar múgedektigin azaıtýǵa baǵyttalǵan taǵy bir qadam. Buǵan deıin bul qor men onyń seriktesteri úsh jyl ishinde shala týǵan sábılerdiń kórý qabileti nasharlyǵyn tolyq joıýǵa qol jetkizgen bolatyn.
«Qazir Qazaqstanda 110 myńnan astam múgedek bala bar. Bul kórsetkish bizdi qatty mazalaıdy. Halyk Bank qoldaýynyń arqasynda biz 2 perzenthana men 2 emhanany jańa týǵan balalardyń estý qabileti boıynsha jasyryn problemalardy erte dıagnostıkalaýǵa arnalǵan zamanaýı quraldarmen jaraqtandyrdyq. Barlyq ata-analarǵa aıtqym keletini: perzenthanada balańyzdyń estý qabiletin tekserip alý múmkindigin jiberip almańyzdar. Problema neǵurlym erte anyqtalsa, soǵurlym múgedektikti boldyrmaý jáne balaǵa tolyqqandy ómir berý múmkindigi artady», – dep atap ótti AYALA qaıyrymdylyq qorynyń negizin qalaýshy jáne prezıdenti Aıdan Súleımenova.
Tereńdetilgen skrınıng balanyń estý kemistigin anyqtaǵanda, ony qosymsha tekserý úshin mamandarǵa jiberedi. Qajet bolǵan jaǵdaıda estý apparattary «DOM» qorynyń «Balalarǵa ómir syıla» jobasy sheńberinde beriletin bolady. Al estýdi protezdeý MÁMS esebinen Almaty qalasyndaǵy №5 qalalyq klınıkalyq aýrýhanada júrgiziledi.Osy oraıda aıta ketsek, AYALA qaıyrymdylyq qory – neonatologıaǵa mamandanǵan Qazaqstandaǵy jalǵyz qaıyrymdylyq qory. Óz jumysynyń 18 jyly ishinde qor elimizdiń 67 perınataldyq ortalyqtaryn, balalar aýrýhanalary men ǵylymı ortalyqtaryn zamanaýı medısınalyq jabdyqtarmen jaraqtandyrýǵa 2,3 mlrd teńgeden astam qarajat tartty. Bul 2007 jyldan beri júzdegen myń balanyń ómirin saqtap qalýǵa kómektesti.