Lýdomanıaǵa shaldyqqandar kóbeıip barady.
Ótken jyldyń osy kezeńinde Almatydaǵy psıhıkalyq densaýlyq ortalyǵynyń senim telefonyna 80-nen asa qońyraý túsken. Al bıyl 150-ge jýyq adam kómek suraǵan, dep habarlaıdy Almaty-akshamy.kz 24.kz-ke silteme jasap.
Sondyqtan, qumar oıyndardyń jarnamasyn júgendeý kerek. Olaı bolmaǵan jaǵdaıda lýdomandardyń qatary tipten artyp ketedi. Ortalyq mamandarynyń pikiri osyndaı.
Dárigerlerdiń aıtýynsha, lýdomanıaǵa shaldyqqan adamnyń eń birinshi minez-qulqy ózgeredi. Qarapaıym sózben aıtsaq, únemi sirkesi sý kótermeı turady. Ashýlanshaq bolyp ketedi. Tún uıqysy buzylady. Oǵan qosa, asqa zaýqy bolmaıdy. Eshkimmen sóılespeıdi. Osy belgiler baıqalǵan kezde mamanǵa qaralý kerek. Jaqyndary qolushyn sozýy tıis. Áıtpese onyń sońy qıyn jaǵdaıǵa ákeledi, dep dabyl qaǵyp otyr dárigerler. Muny lýdomanıaǵa shaldyqqan jigit aǵasy da rastaıdy. Ol aty-jónin aıtpaýymyzdy ótindi. Jasy 50-ge jýyqtap qalǵan. Qumar oıyndy 5 jyl boıy oınaǵan. Ózdiginen qoıa almaǵan soń Pavlodardaǵy psıhıkalyq densaýlyq ortalyǵynyń ońaltý ortalyǵyna kelgen. 5 aı boldy osynda. Taǵy 2 aı jatady. Oıynnyń kesirinen jumysynan shyǵyp qalǵan. Týǵan-týys, dos-jarandarymen araz. Endi múldem qoıamyn,-dep otyr. Ol keńesshiler kýrsyn oqyp, ózi sıaqty qumar oıynǵa kirip ketken adamdarǵa kómekteskisi keledi.
«Ózimizdiń patologıamyz, qıyndyq izdep san myń jerden ketip qalǵymyz keledi. Sony oılap neshe túrli oı keledi. Sondyqtan mamanmen sóılesý kerek. Olar ishki dúnıeńdegi nárselerdi syrtqa alyp shyǵyp, jumys isteıdi. Sonda oılaısyń shyǵyp ketseń oıynǵa barar edim dep. Osy jerge kelip sanaǵan kezde 80 mln teńge utylyppyn», - deıdi lýdoman.
Lýdomanıanyń jas talǵamaıtynyn Almatydaǵy psıhıkalyq densaýlyq ortalyǵynyń dırektory Sapar Rahmensheev te rastap otyr. Kómek surap kelgenderdiń qatarynda jasóspirimnen bastap, zeınetkerge deıin bar. Qumar oıynǵa táýeldilikten aryla almaı júrgen jandarǵa der kezinde kómek kórsetpese, óz-ózine qol jumsaýy múmkin, - deıdi. Sońǵy kezde mundaǵy senim telefonyna habarlasatyndar kóbeıgen. Jaqyn arada bir jas jigit kelip, muńyn shaqqan.
«Sonda ol aıtyp otyr: «Meniń qaryzym kóbeıip ketti. Meniń jurttyń betine qaraýǵa da betim joq. Ony ıá, qutylaıyn desem jumysym joq. Olar maǵan zvondap, kúnde izdeıdi. Sondyqtan men budan birjola qutylǵym kelip, ózime qol jumsaǵym keldi» - deıdi. Sóıtip, bizge, bizdiń senim telefonǵa habarlasyp, sosyn bizdiń psıholog, psıhoterapevt mamandarǵa kelip, osy jerde em qabyldady», - deıdi psıhıkalyq densaýlyq ortalyǵynyń dırektory Sapar Rahmensheev.
Psıhoterapevt Marıa Tokareva lýdomanıanyń da birneshe kezeńi bolatyndyǵyn aıtady. Bas kezinde oıynshy ózin qadaǵalap júrgendeı bolady. Biraq ýaqyt óte qumar oıynsyz tura almaıtyn halge jetip, onyń jeteginde ketkenin bilmeı qalady, - deıdi.
«Oıyndy jıi oınaǵan saıyn ózin basqarýdy, aqshasyn qalaı jumsaý qajettigin qoldan shyǵaryp alǵanyn uqpaı qalady. Keıin ony úreı bıleı bastaıdy. Ol barlyq emosıany oıynnan alǵysy keledi. Sóıtip, jumysynda, otabasynda túıitkilder paıda bolady. Qaryzǵa batady. Eń sońǵy satyda óz-ózine esep bere almaıdy. Oıynnyń kesirinen bári keri ketedi. Árıne, bul tuńǵıyqtan shyǵý úshin mamannyń kómegi qajet», - deıdi psıhoterapevt Marıa Tokareva.
Sońǵy zertteýlerge sáıkes, elimizde árbir besinshi jas lýdoman, qumar oıynnyń quryǵyna ilingen. Osy jyldyń 4 aıynda býkmekerlik kompanıalardyń aınalymyna 100 mıllıard teńgeden astam qarajat túsken. Bul jáıtti budan ári ýshyqtyrmaı rettegen jón. Qazir Parlament Májilisiniń depýtattary lýdomanıaǵa qatysty zań jobasyn ázirlep jatyr.